Türkiyədə fəaliyyət göstərən Qadın Ticarət İşəgötürənlər Həmkarlar İttifaqı (Kadın-TİS) qadın sahibkarların beynəlxalq səviyyədə birləşdirilməsi istiqamətində mühüm addımlar atır.
Avropa.info xəbər verir ki, İttifaqın sədr müavini Songül Uzun bu barədə ERAmedia-ya özəl açıqlamasında bildirib.
Songül Uzun qeyd edib ki, Kadın-TİS Türkiyə Cümhuriyyəti Əmək və Sosial Təhlükəsizlik Nazirliyinə bağlı olaraq yaradılıb və bu status quruma əlavə güc verir. Onun sözlərinə görə, 11 yanvar 2025-ci ildə təsis olunan ittifaqın əsas məqsədi qadın sahibkarların və işəgötürənlərin hüquqlarını qorumaq, iş həyatında bərabər imkanlar yaratmaq və qadınların iqtisadi gücünü artırmaqdır.
“Qadın Ticarət İşəgötürənləri Həmkarlar İttifaqının sədri Esra Oksay xanımdır.
Mən isə sədr müavini olmaqla yanaşı, eyni zamanda beynəlxalq ticarət sahəsində işəgötürən qadınların bir araya gətirilməsi və onların bu sahədə nələr edə biləcəklərinin inkişaf etdirilməsi məsuliyyətini üzərimə götürmüşəm.
Bu məsuliyyət çərçivəsində, dünyanın harasında olursa-olsun, iş qadınları bir araya gəldiyi zaman bundan sonrakı strategiya olaraq nələr edə biləcəyimizi müəyyənləşdiririk. Bir araya gəldikdə yalnız bir-birimizə dəstək verməklə kifayətlənmir, həm də qadın sahibkarlara necə daha güclü dəstək verə biləcəyimizi və onların hüquqlarını necə daha effektiv şəkildə qoruya biləcəyimizi düşünürük”, – deyə o əlavə edib.
Sədr müavini vurğulayıb ki, Kadın-TİS yalnız Türkiyə ilə məhdudlaşmayan geniş vizyona malikdir. “Biz Türk Dünyasında qadın işəgötürənləri bir araya gətirən vahid platforma yaratmaq istəyirik. Azərbaycandakı bir tekstil istehsalçısı, Qazaxıstandakı proqramçı və ya Quzey Kıbrısda xidmət sektorunda çalışan qadın sahibkar eyni problemlərlə üzləşir. Məqsədimiz bu qadınları bir şəbəkədə birləşdirməkdir”, – deyə o bildirib.
Onun sözlərinə görə, təşkilat Türk Dünyası üzrə rəqəmsal və ticarət əlaqələrini gücləndirəcək yeni model üzərində çalışır. “Hədəfimiz Bakıdan çıxan məhsulun Nyu-Yorka, İstanbuldan çıxan məhsulun isə Almatıya ən sərfəli və təhlükəsiz şəkildə çatdırılmasını təmin edəcək logistika və ticarət dəhlizi yaratmaqdır”, – deyə Uzun qeyd edib.
Songül Uzun əlavə edib ki, qadın işəgötürənlər texnologiyanın yalnız istifadəçisi deyil, həm də istehsalçısı olmalıdır:
“Rəqəmsal transformasiyada aktiv rol almalıyıq. Bununla yanaşı, Türk Dünyası üzrə ortaq zəmanət fondu və investisiya şəbəkəsi yaradaraq qadın sahibkarların maliyyə təhlükəsizliyini təmin etməyi planlaşdırırıq”.
O bildirib ki, Kadın-TİS gələcəkdə beynəlxalq federasiya formatında fəaliyyət göstərməyi hədəfləyir və artıq bir sıra ölkələrlə əlaqələr qurulur.
Sədr müavini Azərbaycanın xüsusi əhəmiyyət daşıdığını da vurğulayıb. “Azərbaycanda qadın işəgötürənlərlə görüşlər keçirmişik və burada nümayəndəliyin yaradılması istiqamətində müzakirələr aparmışıq. Yaxın zamanda rəsmi səfər həyata keçirməyi planlaşdırırıq”, – deyə o bildirib.
Songül Uzun qeyd edib ki, növbəti mərhələdə Özbəkistan, Türkmənistan, Qırğızıstan, Qazaxıstan və Quzey Kıbrıs Türk Cümhuriyyətində də qadın sahibkarlarla əməkdaşlıq genişləndiriləcək.
Sonda o vurğulayıb ki, əsas məqsəd yalnız nümayəndəliklər açmaq deyil, Türk Dünyasında qadın sahibkarlar arasında real əməkdaşlıq və qarşılıqlı dəstək mexanizmləri yaratmaqdır.
Avropa.info
