15 oktyabr Ümumdünya Kənd Qadınları Günü kimi qeyd olunur.
BMT-nin təşəbbüsü ilə 2008-ci ildən qeyd olunan bu gün Azərbaycanda ilk dəfə 2019-cu ildə maraqlı bir tədbirlə qeyd olunmağa başlayıb. İllər əvvəl baş tutan tədbirin təşkilatçısı Azərbaycan Kənd Qadınları Assosiasiyası olub.
Məhz həmin tarixdə Ağcabədidə keçirilən ilk tədbirin iştirakçıları bəlkə də güman etməzdilər ki, qısa müddət sonra Azərbaycanın kənd qadınları öz işgüzarlıqları, əzmləri, bacarıqları ilə dünyada nümunə göstəriləcəklər. Kənd qadınlarının əməyi istəklə birləşəndə, ortaya elə bir mənzərə çıxacaq ki, onu beynəlxalq təşkilatlardan tutmuş ayrı-ayrı ölkələrə qədər nümunə göstərəcəklər.
Cəmi 5 il sonra, 2024-cü ilin 15 oktyabrdında Azərbaycan Kənd Qadınları Assosiasiyasının bayram tədbirində ölkəmizin müxtəlif bölgələrindən gələn qadınlar o günlərə, keçdikləri yola, qazandıqları uğurlara nəzər salıb, fəxrlə danışırdılar. Budəfəki tədbirdə uzaq Hindistanda da qonaqları vardı.
Azərbaycan Kənd Qadınları Assosiasiyası Beynəlxalq Şurasının Sədri Tara Şarafudin həyat yoldaşı ilə uğurlarının, irəliləyişlərinin az qala hər addımı izlədiyi bu qadınların sevincini bölüşürdü.
Tədbiri giriş sözü ilə açan Azərbaycan Kənd Qadınları Assosiasiyasının rəhbəri Gülbəniz Qənbərova o günləri belə xatırlayır:
“2019-cu ildə Ağcabədidə Ümumdünya Kənd Qadınları Gününü qeyd edəndə Ailə, Qadın və Uşaq Problemləri üzrə Dövlət Komitəsinin ozamankı sədri Hicran Hüseynova, BMT-nin Azərbaycandakı nümayəndəsi Qulam İsakzai təbrik məktubu göndərmişdi. Balakəndən bir qrup qadın tədbirdə iştirak üşün öz təşəbbüsləri ilə Ağcabədiyə gəlmişdilər.
O zaman qadınlara baxanda, bilirdim ki, biz bu onlarla birlikdə çox uğura imza atacağıq. Elə də oldu, yavaş-yavaş təşkilatlandıq, sıralarımız genişləndi, təşəbbüslərimiz daha çox diqqət gördü.
İlk dəfə qadın qrupları ilə görüşəndə onların bəzilərinin narahatlığını anlayırdım, zaman keçdikcə hamısı özünə güvənməyə başladı, böyük inkişafa imza atdılar. Mən qadınlarımızla fəxr edirəm. Kənd qadınlarının inkişafı həm də dövlət siyasətidir, onlar əsas ərzaq istehsalçılarıdır. Təsadüfi deyil ki, 16 oktyabr dünyada Beynəlxalq Ərzaq Günü kimi qeyd olunur. Ölkə əhalisinin ərzaqla təminatında da qadınların rolu əvəzsizdir”.
Kənd qadınlarının inkişafına yönəlik bir sıra layihələrin rəhbəri olan G.Qənbərova gələcək layihələrdən də danışıb. Onun sözlərindən aydın olub ki, Kənd Qadınlarının Milli Platformasını yaratmaq istiqamətində tədbirlər görülür:
“Kənd təsərrüfatı naziri ilə bu barədə müzakirələrimiz olub və təşəbbüsümüz dəstəklənib. Bu platformanın yaradılması nəticəsində qadınlarımız özlərini milli səviyyədə təqdim edə biləcəklər. Kənd qadınları özləri özlərinə kömək olmalıdırlar ki, həyatları dəyişsin.
Bu gün fəxrlə deyə bilirik ki, hazırda Azərbaycanda qadın özün-kömək qruplarının 780 üzvü var. 30-a yaxın ölkədə belə qadın özünəkömək qrupları fəaliyyət göstərir. Səylərimiz, əzmimiz, fəaliyyətimiz sayəsində bu say hər gün daha da artır və proses davamlıdır”.
Beynəxalq Şuranın sədri Tara Şarafudin bayram münasibətilə təbrikini Azərbaycan dilində çatdırıb:
“Mən 20 yaşımda Hindistanda olduqca çətin bir vəzifədə çalışmışdım. 4.5 milyon əhalisi olan Kerala ştatında Qubernator idim və bu vəzifədən sonra mənə heç nə çətin görünmürdü. Əminəm ki, qadınlar istənilən məsələdə uğur qazana, hər bir situasiyanı idarə edə bilər”.
Assosiasiyanın Lənkərandan olan üzvü, bir sıra biznes layihələrinin müəllifi Rəftarə Şükürova öz təcürəsini bölüşüb və dəstəyə görə həm Assosiasiya rəhbərliyinə, həm də beynəlxalq təşkilata təşəkkürünü çatdırıb.
Kənd Təsərrüfatı Nazirliyinin Kooperativlərin İnkişafı sektorunun əməkdaşı Sevda Məmmədli qadınların uğur hekayələri ilə maraqlanıb, bütün bu uğurların qazanılmasında G.Qənbərovanın iştirakını xüsusi vurğulayıb. İştirakçılarla Yaponiya təcrübəsini bölüşən nazirlik rəsmisi “Siz böyük əməyinizin bəhrəsini görürsünüz, inkişafa doğru addm-addım gedirsiniz. Qadınlar özlərini heç kəsə sübut etməyə çalışmasınlar, onların qazandığı uğurlar özü sübutdur”,-deyib.
Balakəndə fəaliyyət göstərən “Novruz” qadın qrupunun rəhbəri, “Tərəqqi” medallı Məsarət Qaysayeva öz təcrübələrini bölüşüb. Bildirib ki, 2018-ci ildə ilk dəfə həmin qadın qrupu yaradılıb və ötən müddət ərzində qadınlar xeyli nailiyyət əldə ediblər:
“Biz ilk dəfə şirniyyat evi qurduq, indi artıq məhsullarımız hər yerdə tanınır. Yeni qadın qruplarının yaradılması bizi sevindirir. Çünki ölkəmizdə kənd təsərrüfatının inkişafı həm də dövlət siyasətidir.
Bu siyasətə dəstək olaraq kooperativlərin yaradılması həm də qadınların ictimai həyatda fəal iştirakçılığına səbəb olur”.
Goranboydan gəlmiş nümayəndə, bələdiyyə sədri Manya Allahverdiyeva qadın iştirakçılığının vacibliyinə diqqəti çəkib. Onun sözlərinə görə, ilk dövrlərlə müqayisədə çox böyük dəyişiklik var.
Zaqataladan olan “Çinar” qadın qrupunun rəhbəri Səadət Dibirova qadın əməyinin bütün dünyanı dəyişmək gücündə olduğunu vurğulayıb:
“Bacarmaq üçün başlamaq lazımdır. Biz bunu özümüzə deviz seçdik. Çox şadam ki, indi bizim Zaqatala rayonunda 4 qadın qrupumuz, 3 kooperativimiz var. Adımız Zaqataladakı 850 il yaşı olan çinar ağacından götürülüb, qadınları sanki çinar ağacının altında birləşdirib güclərinə güc qatmışıq”.
Əməkdar müəllim, “Tərəqqi” medalına layiq görülən Elmira Hacıyeva isə bu işə təqaüdə çıxandan sonra başlayıb:
“Öz gücümüzlə yola çıxdıq, bu yolda Assosiasiya və onun rəhbərliyi bizə dəstək oldu.
Bir sıra yeniliklər etdik, qrupumuzda olan qadınların ümumilikdə 41 ha torpaq sahəsi var. Həmin ərazidə korporativin üzvləri ilə birlikdə əkin işləri apardıq, yetişdirdiyimiz məhsuldan xeyli qazanc əldə etdik. Həmin vəsaitdən ayırdığımız məbləğlə şəhid ailələri, müharibə əlilləri, qazilərlə bağlı müxtəlif tədbirlər, anım mərasimləri keçiririk. Bu, bizim üçün böyük fəxrdir”.
“Şamama” qadın qrupunun rəhbəri Bəsti Yusifova çıxışında yeniliklərdən danışıb, həyata keçirdikləri layihələrlə tədbir iştirakçılarını tanış edib.
Olduqca maraqlı, işgüzar mühitdə, bayram əhval-ruhiyyəsi ilə keçən tədbirin sonunda bəzi iştirakçılara təşəkkürnamə təqdim ounub. Bütün iştirakçılar isə bayramı həm də hədiyyələrlə qeyd ediblər.
Elnarə Kərimova
