“Prezident İlham Əliyevin “Məşğulluq Strategiyasının həyata keçirilməsinə dair 2026-2030-cu illər üçün Tədbirlər Planı” ilə bağlı imzaladığı Sərəncam müasir əmək bazarının çağırışlarına tam cavab verən təqdirəşayən bir adımdır. Əmək bazarı sürətlə dəyişir, rəqəmsallaşma və fərqli məşğulluq formaları ön plana çıxır. Lakin sənəddə nəzərdə tutulan çevik iş rejiminin mahiyyəti cəmiyyətə düzgün izah olunmalıdır; söhbət iş saatlarının azaldılmasından deyil, beynəlxalq təcrübə öyrənilərək ölkəmiz üçün ən optimal modelin tapılmasından gedir”.

Avropa.info xəbər verir ki, bunu Sosdem.az-a dövlət başçısının Məşğulluq Strategiyası ilə bağlı son Sərəncamını, əmək bazarında gözlənilən yenilikləri və çevik iş rejiminin tətbiq mexanizmlərini şərh edərkən Milli Cəbhə Partiyasının (MCP) başqanı, deputat Razi Nurullayev deyib.

“Çeviklik İş Yükünün Artması Deyil…”

Millət vəkili yeni modelin tətbiqi zamanı işçi və işəgötürən maraqlarının bərabər qorunmasının vacibliyini vurğulayıb:

“Bu prosesdə əsas prinsip işçinin hüquqları ilə işəgötürənin maraqları arasında sağlam balansın saxlanılması olmalıdır. Çevik iş rejimi işçinin istismar olunması və ya hüquqlarının zəiflədilməsi hesabına baş verməməlidir. Əksinə, əsas məqsəd iş vaxtını daha səmərəli təşkil etmək, məhsuldarlığı yüksəltmək və insanların əmək bazarında iştirak imkanlarını genişləndirməkdir. Bu model İT, maliyyə, xidmət və ofis mühitində özünü doğrulda bilsə də, istehsalat, səhiyyə, nəqliyyat və fasiləsiz xidmət sahələrində eyni qaydada tətbiq edilə bilməz. Ona görə də hər bir sahənin spesifikliyinə uyğun xüsusi mexanizmlər hazırlanmalıdır”.

“Uğurun Açarı Geniş İctimai Müzakirələr, Praktiki Tətbiqdən Asılıdır”

MCP başqanı Sərəncamın icrası prosesində sosial tərəfdaşlığın və geniş müzakirələrin zəruriliyini diqqətə çatdırıb:

“Bu cür fundamental dəyişikliklər hazırlanarkən həmkarlar ittifaqları, sahibkarlar, ekspertlər və vətəndaş cəmiyyəti institutları prosesə fəal cəlb olunmalıdır. Yalnız bütün tərəflərin iştirakı ilə qəbul edilən qərarlar həm işçilər, həm də işəgötürənlər üçün real fayda verəcək. Sərəncam özlüyündə dövrün tələbinə tam uyğundur. Ancaq onun yekun uğuru yaradılacaq hüquqi baza və praktik tətbiqdən asılı olacaq. Əgər əsas hədəf insan əməyinin səmərəliliyini artırmaq, iş və şəxsi həyat arasında tarazlıq yaratmaqdırsa, atılan addımlar iqtisadiyyatımıza böyük töhfə verəcək”