Dünyaca məşhur futbolçu Kriştiano Ronaldo rekordlarla dolu karyerasının ardından peşəkar futbolçu karyerasının son dövrünə qədəm qoyduğu mesajını verib.
Avropa.info xəbər verir ki, 5 dəfə “Qızıl top” mükafatını qazanan 41 yaşlı portuqaliyalı ulduz həyat yoldaşı Georgina Rodriguez ilə evləndikdən sonra “Vogue” jurnalına verdiyi açıqlamada “Bu, yəqin ki, futbol karyeramın son ilidir və arxamda möhtəşəm bir miras qoymaq istəyirəm” deyib.
Gələcəyini tam olaraq planlaşdırdığını bildirən Ronaldo ailəsi ilə daha çox vaxt keçirməyi səbirsizliklə gözlədiyini bildirib.
Futboldan sonra yaranacaq boşluğu fərqli axtarışlarla dolduracağını bildirən təcrübəli oyunçu səyahət etmək, həvəsi olduğu padel oynamaq və 25 illik fədakarlıqdan sonra əldə etdiyi uğurun dadını çıxarmaq istədiyini bildirib.
1000 qol
Bu yay Portuqaliya millisinin heyətində karyerasının altıncı dünya çempionatında çıxış edən və tora imza ataraq rekord qıran Ronaldo indiyədək klub və milli komanda karyerasında cəmi 976 qola çatıb.
“Mançester Yunayted”, “Real Madrid”, “Yuventus” kimi nəhəng klublarda çıxış edən ulduz futbolçu karyerası boyunca 1000 qol həddini keçməyi hədəfləyir.
Səudiyyə Ərəbistanı təmsilçisi “Əl-Nəsr”lə müqaviləsinin son ilinə qədəm qoyan Ronaldonun tarixi hədəfinə çata bilib-bilməyəcəyi performansı müəyyən edəcək.
