Azərbaycan Milli Elmlər Akademiyasının (AMEA) Mərkəzi Elmi Kitabxanasında AMEA-nın Azad Həmkarlar İttifaqının nümayəndələri ilə görüş keçirilib.
Avropa.info xəbər verir ki, görüşün məqsədi Azərbaycan Həmkarlar İttifaqları Konfederasiyası (AHİK) tərəfindən həyata keçirilən yeniliklər barədə əməkdaşları məlumatlandırmaq olub.
Mərkəzi Elmi Kitabxananın həmkarlar təşkilatının sədri Günel Rəhimova giriş sözü ilə çıxış edərək tədbirin əhəmiyyətindən danışıb, əməkdaşların sosial rifahının yaxşılaşdırılması istiqamətində görülən işləri diqqətə çatdırıb.
Görüşdə AMEA Azad Həmkarlar İttifaqının sədr müavini Şəhla Əmirova çıxış edərək bildirib ki, təşkilatın əsas məqsədi əməkdaşların sosial rifahının yüksəldilməsi, onların hüquq və mənafelərinin qorunması, eləcə də iş mühitində sağlam və təhlükəsiz şəraitin təmin olunmasıdır. O vurğulayıb ki, Həmkarlar İttifaqı AHİK tərəfindən həyata keçirilən yeniliklərin tətbiqinə və üzvlərin bu imkanlardan səmərəli istifadəsinə xüsusi önəm verir.
Qeyd olunub ki, ölkəmizdə əmək münasibətlərinin tənzimlənməsi, işçilərin sosial müdafiəsinin gücləndirilməsi və rifahının artırılması istiqamətində dövlət tərəfindən ardıcıl tədbirlər həyata keçirilir, həmkarlar ittifaqlarının fəaliyyəti üçün əlverişli şərait yaradılır və bu sahədə aparılan islahatlar mühüm nəticələr verir.
Daha sonra AHİK-in həyata keçirdiyi “AHİK Plus” layihəsi barədə ətraflı məlumat təqdim olunub. Qeyd edilib ki, layihə yalnız həmkarlar ittifaqı üzvləri üçün nəzərdə tutulub və əsas məqsədi onların sosial rifahını yüksəltmək, gündəlik həyatlarında əlavə üstünlüklər əldə etmələrinə şərait yaratmaqdır.
Bildirilib ki, layihə çərçivəsində üzvlər sosial tərəfdaş müəssisələrin təqdim etdiyi endirimlərdən, bonuslardan və xüsusi güzəştlərdən yararlana bilirlər. “AHİK Plus” layihəsi sosial tərəfdaşlıq prinsipləri əsasında həyata keçirilir və gələcəkdə tərəfdaş müəssisələrin sayının, eləcə də təqdim olunan imkanların daha da genişləndirilməsi nəzərdə tutulur.
Tətbiqin istifadəsinə dair videoçarx nümayiş etdirilib.
Tədbirdə MEK əməkdaşlarını maraqlandıran suallara da aydınlıq gətirilib.
Avropa.info
