İngiltərəli stüardessa Florens Çessonun 2017-ci ildə üzləşdiyi bir hadisə aviasiya sənayesində çox da danışılmayan, lakin minlərlə işçini təhlükə altına atan ciddi bir problemi yenidən gündəmə gətirib.
Avropa.info xəbər verir ki, Florens Çesson 2017-ci ildə Puerto Riko istiqamətində xidmət göstərdiyi transatlantik reys zamanı təyyarədə hiss etdiyi “çirkli corab” qoxusuna bənzər bir iyin adi bir hal olmadığını tez bir zamanda anlayıb. Uçuşun ilk dəqiqələrində meydana çıxan bu qəribə qoxu qısa müddət ərzində nəfəs almaqda çətinlik, ürək bulanması və qusma kimi simptomlara səbəb olub. Təyyarə yerə endikdən sonra Çesson və digər bir ekipaj üzvü xəstəxanaya yerləşdirilib.
Ancaq Çesson üçün əsas çətinliklər elə bundan sonra başlayıb. Aparılan nevroloji müayinələr nəticəsində ona daimi sinir sistemi zədəsi və travmatik beyin zədəsi diaqnozu qoyulub. Həkimlər onun vəziyyətinin idmançılarda tez-tez rast gəlinən Xroniki Travmatik Ensefalopatiya (CTE) xəstəliyinə bənzədiyini bildiriblər.
Çesson həmin anları belə xatırlayır:
“Ağzımda qəribə metal dadı var idi. Bədənim tər içində idi və başım tamam qarışmışdı. Nə dediyimi bilmirdim. Hər şeyi dumanlı bir yuxu kimi xatırlayıram”.
Onun həkimi nevroloq Dr. Robert Kaniecki bu cür simptomlarla müşayiət olunan çoxlu sayda hadisə gördüyünü və belə halların əslində çox da nadir olmadığını qeyd edib. Son 20 il ərzində 12 pilot və 100-dən çox stüardessa eyni şikayətlərlə tibbi yardım alıb.
Bu cür hadisələr təəssüf ki, təkcə keçmişdə qalmayıb. 2024-cü ildə Dubaydan yola düşən “British Airways” təyyarəsi salona yayılan kimyəvi qoxular səbəbilə təcili eniş etməyə məcbur qalıb. Həmin uçuş zamanı sərnişinlər və ekipaj üzvləri başgicəllənmə, ürək bulanması və nəfəs darlığı kimi əlamətlər yaşayıblar. Aviaşirkət olayı “kiçik texniki nasazlıq” kimi qiymətləndirsə də, mütəxəssislər problemin daha dərin olduğunu bildirirlər.
Təyyarələrdə havalandırma sistemlərindən daxil olan hava bəzən mühərrik yağı sızmaları və digər kimyəvi maddələrlə çirklənə bilər. Bu cür zəhərli qazlar kabinəyə yayıldıqda, xüsusilə uzun müddət havada olan ekipaj üzvlərində ciddi sağlamlıq problemlərinə səbəb ola bilər.
Florens Çessonun yaşadıqları, sadəcə fərdi bir faciə deyil, qlobal miqyasda minlərlə aviasiya işçisini təhlükəyə atan sistematik bir problemi ortaya qoyur.
