TikTok-un ana şirkəti ByteDance-in qurucusu Zhang Yiming 105,5 milyard dollar sərvətlə Asiyanın ən varlı adamı olub. Bloomberg-in məlumatına görə, çinli sahibkar 104,8 milyard dollar sərvəti olan hindistanlı iş adamı Qautam Adanini geridə qoyub.
Avropa.info xəbər verir ki, Şirkətin təxminən 21 faizinə sahib olan Zhang-ın sərvəti BlackRock və Fidelity-nin yeni qiymətləndirmələrindən sonra təkcə bu ay 12 milyard dollar artıb.
Bloomberg sərvətini izləməyə başladığı 2019-cu ildə 13 milyard dolları olan Zhang 7 il ərzində sərvətini təxminən 8 dəfə artırıb.
Süni intellektə investisiyalar artıma səbəb oldu
ByteDance-in TikTok və Douyin kimi məşhur platformalardan əldə etdiyi məlumatlarla süni intellekt modelləri hazırladığı və texnologiya sahəsində böyük addımlar atdığı bildirilib.
Giriş qadağası böhranına və ABŞ ilə tənzimləyici maneələrə baxmayaraq, şirkət süni intellektə investisiyalarını davam etdirdi.
Omdia tədqiqat şirkətinin baş analitiki Lian Jye Su, Zhang’ın düzgün addımlar atdığını və süni intellektə investisiyaları qətiyyətlə artırdığını söylədi.
Süni intellekt sərvəti artırır
Süni intellekt texnologiyasındakı inkişaflar qlobal milyarderlərin siyahısını sürətlə dəyişir. Dell Technologies-in qurucusu Maykl Dell, süni intellektə yönəlmiş server gəlirlərinin təsiri ilə sərvətini 262 milyard dollara çatdıraraq, dünyanın 5-ci ən varlı adamı oldu. Google-un həmtəsisçisi Larri Peyc keçən il süni intellekt modeli Gemini 3-ün elanından sonra sərvətini 252 milyard dollara çatdıraraq Jeff Bezosu geridə qoydu.
