Prezident Administrasiyasında Milli Cəbhə Partiyasının (MCP) başqanı, deputatı Razi Nurullayevlə görüş keçirilib.
Avropa.info xəbər verir ki, İyunun 2-də Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyevlə keçirilən görüşdə ölkənin daxili siyasi həyatı və partiyaların fəaliyyəti ilə bağlı geniş fikir mübadiləsi aparılıb.
Siyasi dialoq və milli maraqlar ətrafında müzakirələr
Görüşdə ölkədə keçirilən nüfuzlu beynəlxalq tədbirlərin əhəmiyyəti, “Böyük Qayıdış” Dövlət Proqramı çərçivəsində keçmiş məcburi köçkünlərin doğma torpaqlarına qayıtması istiqamətində görülən işlər, infrastruktur layihələri və dövlətin müxtəlif sahələrin inkişafı ilə bağlı təşəbbüsləri müzakirə olunub. Həmçinin informasiya məkanında vaxtaşırı rast gəlinən qərəzli təxribatlara qarşı fəal mövqe nümayiş etdirilməsinin zəruriliyi vurğulanıb.
Söhbət zamanı Prezident İlham Əliyevin təşəbbüsü ilə aparılan iqtidar-müxalifət siyasi dialoqunun milli həmrəyliyin qorunmasında müstəsna rolu qeyd edilib, Milli Məclisdə təmsil olunan partiyaların qanunvericilik işindəki fəallığı təqdir olunub.
MCP dialoq ənənələrinə sadiqliyini ifadə edib
Razi Nurullayev rəhbərlik etdiyi partiyanın həyata keçirdiyi layihələr barədə məlumat verib. O, siyasi partiyaların ictimai müzakirələrdə iştirakının demokratik ənənələrin formalaşmasına müsbət təsir etdiyini bildirərək, MCP-nin bundan sonra da dialoq ənənələrinə sadiq qalacağını və milli maraqlara xidmət edən təşəbbüsləri dəstəkləyəcəyini vurğulayıb.
Prezident Administrasiyasının rəsmisi Ədalət Vəliyev partiyanın dövlətçilik mövqeyinin və reallaşdırdığı layihələrin siyasi dialoq prosesində müsbət qarşılandığını qeyd edərək, MCP-yə gələcək fəaliyyətində uğurlar arzulayıb.
Avropa.info
