Misir dünyanın ən mühüm dəniz keçidlərindən biri olan Süveyş kanalının “təhlükəsiz” olduğunu və kanalda dəniz naviqasiyasının normal şəkildə davam etdiyini açıqlayıb.
Avropa.info xəbər verir ki, Misir Süveyş Kanalı İdarəsindən verilən açıqlamaya görə, Süveyş Kanalı İdarəsinin sədri Usamə Rabi Nəqliyyat Nazirliyinin Dəniz Nəqliyyatı Sektoru tərəfindən İsgəndəriyyə şəhərində təşkil edilən 2026-cı il Dünya Dəniz Günü münasibətilə keçirilən mərasimdə çıxış edib.
Rabi, Süveyş kanalının təhlükəsiz olduğunu, gəmi tranzitlərinin müntəzəm olaraq davam etdiyini və ötən ilin avqust ayında əldə edilən gəlirin 2025-ci ilin eyni dövrü ilə müqayisədə 56,7 faiz artaraq 567,1 milyon dollara çatdığını bildirib.
Süveyş kanalının naviqasiya trafikinin nizamlı olduğunu və göstərilən xidmətlərin yüksək səmərəli olduğunu vurğulayan Rabi, pilotların ən yüksək performans və hazırlıqla çalışdıqlarını ifadə etdi.
Naviqasiya hesabatlarının kanalda keçid nisbətlərində yaxşılaşma olduğunu vurğulayan Rabi, avqust ayında 68,3 milyon ton xalis yük daşıyan 1358 gəminin kanaldan keçdiyini və 567,1 milyon dollar gəlir əldə edildiyini qeyd etdi.
Ötən ilin eyni ayında 45,2 milyon ton xalis yük daşıyan 1070 gəminin keçdiyini və 326 milyon dollar gəlir əldə edildiyini xatırladan Rabi, gəmi sayında yüzdə 27, xalis yük məbləğində yüzdə 51,1, gəlirlərdə isə yüzdə 56,7 artım olduğunu bildirib.
Son illərdə qlobal və regional geosiyasi dəyişikliklərə toxunan Rabi beynəlxalq böhranların qlobal təchizat zəncirlərinə birbaşa təsir etdiyini, lakin Süveyş kanalının bu zəncirlərin təhlükəsizliyində kritik rolunu və əvəzolunmaz mövqeyini bir daha sübut etdiyini vurğuladı.
Qırmızı dənizdəki inkişaflar və Babulmandeb gərginliyi
Misir rəsmilərinin verdiyi bu açıqlamalar Qırmızı dənizi Ədən körfəzinə birləşdirən və Süveyş kanalının qapısı olan Babulmandeb boğazındakı gərginliyin kölgəsində gəlib.
2023-cü ilin oktyabrında İsrailin Qəzza zolağına etdiyi hücumlardan sonra husilər Qırmızı dəniz və Babulmandebdəki ticarət gəmilərini hədəfə aldılar və nəticədə böyük gəmiçilik şirkətləri Ümid burnuna istiqamətlərini dəyişdirdilər.
Misirin xarici işlər naziri Bədr Əbdüləti son qiymətləndirməsində ölkəsinin Qırmızı dənizdəki gərginlik səbəbindən Süveyş kanalından əldə etdiyi gəlirlərdən təxminən 11 milyard dollar zərər gördüyünü bildirib.
