Yəməndə husilər uzun müddətdir ki, Bab əl-Məndəb boğazında gəmiçilik üçün ciddi təhlükə yaradır. Son dövrlərdə onların Qırmızı dənizdə ticarət gəmilərinə qarşı hücumları beynəlxalq gəmiçiliyə əməlli-başlı əngəl törədir. Husilərin fəaliyyətinin qarşısının alınması məqsədilə ABŞ və digər Qərb ölkələri tərəfindən müxtəlif hərbi əməliyyatlar həyata keçirir. Lakin husilərin hücumlarının tamamilə dayandırılması mümkün olmur.
Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, politoloq Məhəmməd Əsədullazadə Qırmızı dənizdəki təhlükəsizlik böhranını və geosiyasi təsirlərini şərh edərkən bildirib.
“Bab əl-Məndəbdəki böhran…”
Ekspert Bab əl-Məndəb boğazının strateji əhəmiyyətini və davam edən hücumların qlobal iqtisadiyyata risklərini diqqətə çatdırıb:
“Husilərin Bab əl-Məndəb boğazında fəaliyyətinin davam etməsi xüsusilə narahatlıq doğurur. Çünki bu boğaz Qırmızı dənizi Ədən körfəzi ilə birləşdirən və dünya ticarəti üçün mühüm əhəmiyyət daşıyan strateji su yoludur. Hazırda əsas suallardan biri ABŞ və müttəfiqlərinin hərbi əməliyyatlarının husilərin fəaliyyətini nə dərəcədə məhdudlaşdıracağı ilə bağlıdır. Əgər husilərin hücumları davam edərsə, Qırmızı dəniz və Bab əl-Məndəb istiqamətində gəmiçilik üçün risklər daha da artacaq. Bu isə dünya ticarətinə, enerji daşıyıcılarının daşınmasına və nəqliyyat xərclərinə təsir göstərə bilər”.
“Husilərin hərbi gücü İranla bağlıdır”
MCP rəsmisi Yəməndəki münaqişənin lokal çərçivədən çıxdığını və Tehranın rolu ilə mürəkkəbləşdiyini vurğulayaraq fikirlərini yekunlaşdırıb:
“Husilərin İranla yaxın əlaqələri də məsələnin daha mürəkkəb xarakter almasına səbəb olur. Buna görə Yəməndə baş verənlər yalnız lokal münaqişə kimi qiymətləndirilmir. Burada İranın regional siyasəti və ABŞ-la münasibətləri də mühüm rol oynayır. Digər tərəfdən, husilərin İran tərəfindən dəstəklənməsi ilə bağlı məsələ də diqqət mərkəzindədir. Husilərin hərbi imkanlarının qorunub saxlanılması İranın regiondakı təsir imkanları ilə birbaşa əlaqələndirilir. Bu baxımdan Yəməndə husilərlə bağlı proseslərin gələcək inkişafı təkcə bu ölkə üçün deyil, bütün region və beynəlxalq gəmiçilik üçün də ciddi əhəmiyyət daşıyır”.
