Şəhid analarının hər zaman başımızın tacı, Vətənin bizə əmanəti olduğunu vurğulayan İnnovasiya və Qadın İnkişafı Təşəbbüsləri İctimai Birliyinin sədri Gülnarə Əmiraslanova Avropa.info-ya açıqlamasında şəhid ailələrinə münasibətdə həssaslığın qorunmasının vacibliyindən danışıb.
Gülnarə Əmiraslanova bildirib ki, şəhid ailələrinə dövlət tərəfindən göstərilən diqqət və qayğı yüksək səviyyədədir və bu ailələrin sosial müdafiəsi daim dövlətin diqqət mərkəzində saxlanılır.
O qeyd edib ki, dövlət qayğısı ilə yanaşı, şəhid ailələrinə həssas yanaşmaq, onların qədrini bilmək və göstərdikləri fədakarlığa layiqli ehtiram göstərmək cəmiyyətin də mənəvi borcudur.
Onun sözlərinə görə, bir şəhid anasının üzərinə gedərək onu cəmiyyət qarşısında hədəfə çevirmək, sözlərini təhrif edərək günahkar kimi qələmə vermək heç bir insani dəyərə və məntiqə sığmır.
Gülnarə Əmiraslanova vurğulayıb ki, əlində dəqiq və təkzibolunmaz sübut olmayan insanların bir ananın qəlbini qırmağa, onu haqsız yerə ittiham etməyə haqqı yoxdur.
İctimai Birliyin sədri bildirib ki, ortada konkret sübut varsa, bu sübutlar açıq şəkildə ortaya qoyulmalı, sübut yoxdursa, şəhid ailəsinin ünvanına ittiham səsləndirməkdən çəkinmək lazımdır.
O əlavə edib ki, şəhid analarına deyilən hər ağır söz və yönəldilən hər qınaq həmin ailənin müqəddəsliyinə, eləcə də şəhidimizin əziz xatirəsinə toxunur.
Onun fikrincə, şəhidə hörmət yalnız onun adını uca tutmaqla məhdudlaşmamalı, həm də şəhid anasının göz yaşına, yaşadığı ağrıya və mənəvi yaralarına hörmətlə yanaşmaqla özünü göstərməlidir.
Gülnarə Əmiraslanova hesab edir ki, övlad acısı ilə yaşayan bir qadını hədəfə almaq böyük ədalətsizlikdir və cəmiyyət belə hallarda susmamalı, şəhid ailələrinin yanında dayanmalıdır.
O vurğulayıb ki, şəhid ailələrinə göstərilən yüksək dövlət qayğısının cəmiyyət tərəfindən də mənəvi dəstək, həssas münasibət və layiqli ehtiramla tamamlanması hər birimizin borcudur.
Gülnarə Əmiraslanova bildirib ki, şəhid ailələri dövlətin diqqət və qayğısı ilə yanaşı, cəmiyyətin də daim xüsusi hörmət və ehtiramını hiss etməlidir. Onun sözlərinə görə, bu ailələr Vətən qarşısında ən böyük fədakarlıqlardan birini edib və onların yaşadığı ağrını, keçirdiyi hissləri nəzərə almadan hər hansı münasibət sərgiləmək doğru deyil. O qeyd edib ki, xüsusilə şəhid analarının sözlərinə, mövqeyinə və yaşadığı mənəvi ağrıya daha həssas yanaşmaq hər birimizin insani məsuliyyətidir.
İctimai Birliyin sədri vurğulayıb ki, şəhid ailələrinin hər hansı məsələdə öz fikirlərini ifadə etməsi onların hədəfə çevrilməsi və ya ictimai qınağa məruz qalması üçün əsas ola bilməz. Onun fikrincə, cəmiyyət olaraq belə ailələrə qarşı ittihamçı deyil, anlayışlı, dəstəkləyici və qoruyucu mövqe nümayiş etdirməliyik. “Şəhidlərin xatirəsinə hörmət yalnız müəyyən günlərdə onların adını yad etməklə deyil, ailələrinə gündəlik münasibətimizdə də öz əksini tapmalıdır”, – deyə Gülnarə Əmiraslanova bildirib.
O diqqətə çatdırıb ki, hər birimiz şəhid ailəsinə göstərilən diqqət və ehtiramın əslində Vətən uğrunda canından keçən şəhidimizin müqəddəs xatirəsinə göstərilən ehtiram olduğunu unutmamalıyıq. Gülnarə Əmiraslanova qeyd edib ki, dövlətin yüksək səviyyədə həyata keçirdiyi qayğı siyasətinə cəmiyyətin də mənəvi həmrəyliyi və həssas münasibəti əlavə olunmalı, şəhid ailələri heç zaman özlərini tək və müdafiəsiz hiss etməməlidirlər.
İctimai Birliyin sədri bildirib ki, şəhid ailələrinə münasibətdə hər bir sözə və davranışa xüsusi diqqət yetirmək, onların qəlbinə toxuna biləcək ifadələrdən çəkinmək və ehtiyac olduqda mənəvi dəstək göstərmək cəmiyyətin mənəvi borcudur.
Avropa.info
