Daşkənd Dövlət Şərqşünaslıq Universitetində Azərbaycan dilini tədris edən filologiya üzrə fəlsəfə doktoru Mətanət Xudiyeva və həmin universitetin III kurs tələbəsi Feruza Sultanova “Azərbaycan dilinin tədrisi və təbliği” layihəsi əsasında Özbəkistanın Milli televiziya kanalının məşhur “Shirchoy” verilişinin qonağı olublar.
Avropa.info xəbər verir ki, veriliş noyabrın 2-də Özbəkistandakı Heydər Əliyev adına Azərbaycan Mədəniyyət Mərkəzinin təşəbbüsü və Diasporla İş üzrə Dövlət Komitəsinin dəstəyi ilə ərsəyə gətirilib. Verilişdə Azərbaycan və Özbəkistan arasındakı dostluq əlaqələri, Azərbaycanın milli adət-ənənələri, mədəniyyəti, mətbəxi ilə bərabər Daşkənd Universitetlərində Azərbaycan dilinin tədrisindən də söhbət açılıb. M.Xudiyeva 44 günlük Vətən müharibəsi zamanı qardaş Özbəkistanın dövlətimizin və xalqımızın daim yanında olduğunu xüsusi vurğulayıb.
Verilişdə həmçinin Özbəkistandakı Heydər Əliyev adına Azərbaycan Mədəniyyət Mərkəzinin və Azərbaycan Respublikası Dövlət Dil Komissiyası yanında Monitorinq Mərkəzinin birgə layihəsi əsasında “Azərbaycan poeziyasından incilər” müsabiqəsinin keçirilməsi və qaliblərin Bakıya səfəri barədə də danışılıb. Müsabiqənin qaliblərindən olmuş Daşkənd Dövlət Şərqşünaslıq Universitetinin III kurs tələbəsi Feruza Sultanova Bakıya səfəri zamanı yadda qalan xoş təəssüratlarından, Azərbaycan xalqının qonaqpərvərliyindən, Azərbaycanın dadlı yeməklərindən danışıb və bu səfərdən çox məmnun qaldığını bildirib.
Daha sonra verilişdə Azərbaycan və özbək musiqiləri səsləndirilib, Özbəkistandakı Heydər Əliyev adına Azərbaycan Mədəniyyət Mərkəzinin “Azərbaycan” rəqs qrupunun ifasında rəqslər ifa olunub.
Sonda azərbaycanlı aşpaz tərəfindən mətbəximizin dadlı yeməkləri hazırlanaraq veriliş iştirakçılarına təqdim edilib.
