YAP Yasamal Rayon Təşkilatı və Beynəlxalq Qalereyanın birgə təşkilatçılığı ilə Ulu Öndər Heydər Əliyevin anadan olmasının 102 illiyinə həsr olunmuş “Vətənpərvərlik Etüdləri” layihəsi çərçivəsində “Xankəndi Mənzərələri” adlı etüd-sərgi təşkil olunub. Layihənin rəhbəri Aygün Əzizovadır. Tədbir Ulus oteldə baş tutub.
Avropa.info xəbər verir ki, sərgini giriş sözü ilə açan Beynəlxalq Qalereyanın direktoru Elnurə İsgəndərova iştirakçıları salamlayaraq günün əhəmiyyətindən danışıb. O, Xankəndidə olmağın hər bir azərbaycanlı üçün qürurverici olduğunu vurğulayıb. Qeyd olunub ki, məhz 2020-ci ilin 4 oktyabrında Cəbrayıl şəhəri işğaldan azad edilib və həmin tarix artıq Cəbrayıl Şəhəri Günü kimi qeyd olunur.
Daha sonra çıxış edən Ulus otelin əməkdaşı Gündüz Behbudov sərginin əhəmiyyətini yüksək qiymətləndirib və belə bir tədbirə ev sahibliyi etməkdən məmnunluğunu bildirib.
Sərgidə fəxri qonaq qismində Ağdam Rayon Heydər Əliyev Mərkəzinin direktoru Namiq Həsənov ailəsi ilə, Fəridə Rəsulova, Nizami Rayon seçki dairəsinin əməkdaşı Gülbahar Bağırova iştirak ediblər.
Etüd-sərgidə RM ART Studionun rəhbəri, Azərbaycan Dövlət Pedaqoji Universitetin nəzdində Azərbaycan Dövlət Pedaqoji Kollecinin müəllimi Rəsmiyyə Mahmudova tələbələri ilə, rəssam Aygün Qürbətova, 180 nömrəli Qaradağ tam orta məktəbin rəsm müəllimi Leyla Babalı, “LAHFİN” dizayn qrupunun ortağı, rəssam Ləman Həsənzadə, “Nurun Yeməkləri” şirniyyat evinin rəhbəri, rəssam Nurtən Xəlilova, Şuşa Dövlət Musiqili Dram Teatrının quruluşçu rəssamı, F.A Art Studionun rəhbəri Fatma Əliyeva, rəssam Firdovsi Hacıyev və digər yaradıcı şəxslər iştirak ediblər.
Sərgidə 44 günlük Vətən müharibəsinə həsr olunmuş 44 əsər nümayiş etdirilib. Tədbirin sonunda iştirakçılara sertifikatlar təqdim olunub, xatirə şəkilləri çəkilib. Qonaqlar həmçinin Xankəndinin görməli yerlərini ziyarət ediblər.
Sərgi Ulus oteldə çay və nahar süfrəsi ilə yekunlaşıb. Həmçinin Rəsmiyyə Mahmudovanın rəhbərlik etdiyi RM ART Studionun 3 illiyi münasibətilə tort kəsilib.
Aygün Oqtay
Fotolar Camalındır
