Fransada 74 yaşlı cərrah Joël Le Scouarnec 30 il ərzində əksəriyyəti uşaqlar olan 299 xəstəyə cinsi istismarda ittiham olunur. Hakim qarşısına ilk dəfə çıxan Le Scouarnec “Mən dəhşətli işlər görmüşəm” deyərək cinayətlərini etiraf edib və məsuliyyəti öz üzərinə götürəcəyini bildirib.
Məhkəmə sənədlərinə görə, Le Scouarnec anesteziya altında olan və ya əməliyyatdan sağalan uşaq xəstələrə qarşı zorakılıq edib. Qurbanların orta yaşının 11 olduğu bildirildi, evində isə həkimin zorakılığını əks etdirən dəftərlər tapıldı.
Şübhəli həkimin 1989-2014-cü illər arasında Fransanın qərbindəki bir neçə xəstəxanada işlədiyi və bu müddət ərzində xəstələrini cinsi istismara məruz qoyduğu iddia edilir.
Təsadüfən ortaya çıxan dəhşətli həqiqətlər
2017-ci ildə qonşuları Bordo yaxınlığındakı Jonzak qəsəbəsində polisə şikayət etdikdən sonra Le Scouarnec haqqında istintaq başladılıb. 2020-ci ildə o, altı yaşlı qonşusuna, dörd yaşlı xəstəyə və iki qardaşı oğluna qarşı cinsi təcavüzə görə 15 il həbs cəzasına məhkum edilib.
Həkimin evində axtarış zamanı polis uşaqlara qarşı zorakılığı əks etdirən 300 mindən çox foto və video tapıb. Bundan əlavə, bəziləri real ölçüdə olan gəlinciklər və qurbanlarının adları yazılmış dəftərlər tapılıb. Le Scouarnec qeyd dəftərlərinin birində guya belə yazıb: “Mən pedofiləm və həmişə belə olacağam”.
İstintaq səhlənkarlığı da araşdırır
Məhkəmə həmçinin həkimin keçmiş cinayətlərindən xəbərdar olmasına baxmayaraq, peşəsini necə davam etdirə bildiyini də sorğu-sual edir. Le Scouarnec 2005-ci ildə uşaq istismarı şəkillərinə sahib olduğu üçün dörd aylıq şərti həbs cəzası aldı. Bu barədə onun işəgötürənlərinə, L’Ordre des Médecins həkimlər birliyinə və Fransa Səhiyyə Nazirliyinə məlumat verilsə də, heç bir sanksiya tətbiq edilməyib.
İşdə zərərçəkmişlərin hüquqlarını 60-dan çox vəkil müdafiə edir. 256 qurbanın 15 yaşdan aşağı olduğu, ən kiçiyinin 1 yaşında olduğu qeydə alınıb. Zərərçəkmişlər hadisələrin xronoloji ardıcıllığı ilə gələn ay məhkəmədə ifadə verəcəklər.
Ailələr ədalət istəyir
Məhkəmədə Le Scouarnec-in keçmiş həyat yoldaşı və üç övladı da ifadə verəcək. “Biz bütün travmalarımızın tanınmasını istəyirik. İllərdir içimizdə bir ağrı daşıyırıq və bu susqunluğun bitməsini gözləyirik”, – deyə qurbanlardan biri Mari deyib.
L’Ordre des Médecins həkimlər həmkarlar ittifaqının bütün məhkəmə prosesi boyu məhkəmədə olması mübahisə mövzusu olub. Uşaqları müdafiə edən La Voix de L’Enfant xeyriyyə təşkilatının vəkili Frédéric Benoist, “Belə ciddi ittihamlar olduqda peşəkar təşkilatın müttəhimlərlə eyni mövqedə olması qalmaqallıdır” dedi .
Məhkəmənin təxminən dörd ay davam edəcəyi gözlənilir və Fransada böyük ictimai rezonans doğurur
