Yardımlı rayonunun Abidinli kənd sakini Ədalət Zeynalov Azərbaycan Respublikasının Birinci Vitse-prezidenti Mehriban xanım Əliyevaya ərizə ilə müraciət edib. Ədalət Zeynalov Mehriban xanım Əliyevaya ünvanladığı müraciətində qeyd edir ki, 2005-ci ildən Yeni Azərbaycan Partiyasının (YAP) üzvüdür və 2016-cı ildən Yardımlı rayonunun 51 saylı Yol İstismarı MMC-də fəhlə kimi çalışır. Müraciətinin məqsədi isə idarə rəhbərliyi tərəfindən özünün və digər işçilərin hüquqlarının pozulması ilə bağlı yaranan ciddi problemləri diqqətə çatdırmaqdır.
“Bildirmək istəyirəm ki, 4 dekabr 2024-cü ildən mən əsassız şəkildə işdən azad edilmişəm. Bu qanunsuz qərar məni və digər işçiləri ciddi şəkildə təəccübləndirdi, çünki pensiya yaşım artıq yaxınlaşırdı, cəmi altı ay sonra 65 yaşım tamam olacaqdı. Bu səbəbdən, işdən çıxarılmağım ədalətsiz bir qərar oldu və mənə çox ağır təsir etdi; həm mənəvi, həm də maddi baxımdan çətinliklərə yol açdı” – deyə şikayətçi bildirir.
Ədalət Zeynalovun sözlərinə görə, 8 il ərzində işlədiyi Yol İstismarı MMC-də heç vaxt əmək intizamını pozmayıb, rəhbərliyin bütün tapşırıqlarını vaxtında və yüksək keyfiyyətlə yerinə yetirib:
“Bundan əvvəlki rəhbərlik mənim işimi daim qiymətləndirib və mükafatlandırıb. Lakin Ceyhun Vaqif oğlu Verdiyev 2024-cü ilin əvvəlində idarəyə yeni müdir təyin olunduqdan sonra vəziyyətimiz pisləşdi. Yeni müdir kollektivə qarşı kobud davranır, işçiləri əmək intizamını pozmaqla hədələyir və müxtəlif bəhanələrlə işdən çıxarmağa çalışır. Hətta bir neçə dəfə bu cür qanunsuz işdən çıxarma halları yaşanıb. Bu təzyiqlər nəticəsində, mənim kimi digər əməkdaşlar da işsiz qalmaq təhlükəsi ilə üzləşiblər. Bütün bunlar əmək hüquqlarımızı ciddi şəkildə pozur. Ceyhun Verdiyevin bu cür davranışları kollektivdə böyük narazılığa səbəb olub və böyük narazılıq yaradır.”
Ədalət Zeynalov şikayətini aşağıdakı fikirlərlə yekunlaşdırıb:
“Hörmətli Mehriban xanım, pensiya yaşımın yaxınlaşması və bu yaşda belə bir vəziyyətə düşməyim mənə çox ağır təsir göstərib. Qarşılaşdığım ədalətsizliyə qarşı köməyinizə ehtiyacım var. Əminəm ki, siz, mənim problemimə diqqətlə yanaşacaqsınız və bu məsələyə müdaxilə edərək mənim və digər işçilərin hüquqlarının bərpa olunmasına köməklik göstərəcəyinizə inanıram”.
Avropa.info şikayətdə adı çəkilən Yardımlı rayonunun 51 saylı Yol İstismarı MMC-nin və rəhbərliyinin mövqeyini dərc etməyə hazır olduğunu bildirir.
