Möhsün Rzai SEPAH generallarından biridir və məlumdur ki, SEPAH-ın Azərbaycana münasibəti uzun müddətdir birmənalı deyil. Bu qurumun nümayəndələri dəfələrlə Azərbaycana qarşı qeyri-konstruktiv mövqe nümayiş etdiriblər. Azərbaycan Baş nazirinin müavini Şahin Mustafayevin İrana səfəri çərçivəsində İranın Ali Milli Təhlükəsizlik Şurasının katibi ilə görüşü zamanı Rzainin diplomatik etiketə uyğun olmayan davranışı da bu yanaşmanın növbəti nümunəsi kimi qiymətləndirilə bilər.
Avropa.info xəbər verir ki, bunu Sosdem.az-a açıqlamasında Milli Cəbhə Partiyasının (MCP) başqan müavini, politoloq Məhəmməd Əsədullazadə İranın diplomatik davranışlarını və iki ölkə arasındakı münasibətləri şərh edərkən bildirib.
“SEPAH generalının davranışı İran daxilindəki fərqli yanaşmaları göstərir”
Ekspert İranın siyasi elitası ilə hərbi eşelonunun Azərbaycana yanaşmasındakı fərqləri xüsusi vurğulayıb:
“Digər tərəfdən, Şahin Mustafayev İran Prezidenti tərəfindən yüksək səviyyədə qarşılanıb və Azərbaycan-İran münasibətlərinin inkişafına verilən önəm bir daha ifadə olunub. Lakin prezident səviyyəsində nümayiş etdirilən münasibətlə SEPAH generalının davranışı arasında müəyyən fərqin olduğu görünür. Bu da İran daxilində Azərbaycanla münasibətlərə fərqli yanaşmaların mövcudluğunu göstərir.
İran tərəfi hər zaman Azərbaycanla dostluq və qardaşlıq münasibətlərindən danışır. Lakin Azərbaycan üçün əsas olan yalnız bəyanatlar deyil, konkret davranışlar və real münasibətlərdir. Son hadisə də göstərir ki, İranın siyasi sistemində Azərbaycanla münasibətlərə fərqli yanaşan qüvvələr mövcuddur”.
“Azərbaycan regional inteqrasiyanı və sülhü dəstəkləyir”
Başqan müavini Azərbaycanın regiondakı strateji rolunu və İrana verilən dəstəyi xatırladıb:
“Azərbaycan isə öz coğrafi mövqeyindən və həyata keçirdiyi siyasətdən irəli gələrək regionda sülhün, təhlükəsizliyin, nəqliyyat əlaqələrinin və iqtisadi inteqrasiyanın inkişafında maraqlıdır. Xüsusilə Şimal-Cənub nəqliyyat dəhlizi çərçivəsində Azərbaycan İran ilə Rusiya arasında mühüm tranzit əlaqələrinin formalaşmasına töhfə verir.
Eyni zamanda, ABŞ-İran qarşıdurması dövründə Azərbaycan İrana siyasi və humanitar dəstəyini nümayiş etdirib. Bu baxımdan, İranın Azərbaycanla normal və qarşılıqlı faydalı münasibətlər sistemi qurması hər iki ölkənin maraqlarına uyğundur”.
“İranın hərbi elitası ölkəni strateji böhrana yuvarlayır”
MCP rəsmisi İranın mövcud böhranlı vəziyyətini dəyərləndirərək fikirlərini yekunlaşdırıb:
“Bu gün İran ciddi iqtisadi, sosial və təhlükəsizlik problemləri ilə üz-üzədir və beynəlxalq təcrid də bu problemləri daha da dərinləşdirir. İran daxilində siyasi gərginliyin davam etməsi isə ölkənin gələcək sabitliyi baxımından əlavə risklər yaradır. Belə bir şəraitdə İranın qonşu dövlətlərlə, o cümlədən Azərbaycanla münasibətlərini qarşıdurma deyil, qarşılıqlı əməkdaşlıq və etimad üzərində qurması daha konstruktiv yanaşma olardı.
Amma, İranın hərbi elitası tam əks-mövqe nümayiş etdirərək ölkəni dərin strateji böhrana yuvarlayır. İran Azərbaycana nümayiş etdirildiyi bu davranışın cavabını almalıdır”.
