Ukrayna prezidenti Zelenski sosial media hesabında Rusiyanın Çernobıl Atom Elektrik Stansiyasına pilotsuz uçuş aparatı (PUA) ilə hücum etdiyini və stansiyanın dağıdılmış 4-cü reaktorunu qoruyan strukturun zədələndiyini açıqlayıb.
Bəyanatda Rusiyanın nüvə obyektlərini hədəf alan hücumlarının qlobal təhlükəsizliyi təhdid etdiyi bildirilib.
Zelenski sosial şəbəkədə bu barədə açıqlama verib:
“Dünən gecə Rusiyaya məxsus yüksək partlayıcı döyüş başlığına malik hücum təyyarəsi Çernobıl Atom Elektrik Stansiyasının dağıdılmış 4-cü enerji blokunda dünyanı radiasiyadan qoruyan sığınacağa düşüb.
Bu sığınacaq Ukrayna tərəfindən Avropa və dünyanın digər ölkələri ilə, Amerika ilə birlikdə tikilib.
İndiki Rusiya dünyada yeganə ölkədir ki, belə yerlərə hücum edir, atom elektrik stansiyalarını işğal edir və nəticələrini düşünmədən müharibə elan edir. Bu, bütün dünya üçün terror təhlükəsidir.
Çernobıl Atom Elektrik Stansiyasındakı sığınacaq bu dron tərəfindən zədələnib. Yanğın söndürülüb. Hazırda radiasiya səviyyəsi artmayıb və daim nəzarətdə saxlanılır.
İlkin qiymətləndirmələrə görə, sığınacağa ciddi ziyan dəyib.
Rusiya hər gecə Ukraynanın infrastrukturuna və şəhərlərinə belə hücumlar həyata keçirir. Rusiya ordusunu genişləndirməyə davam edir və balanssız, anti-humanitar dövlət ritorikasında heç bir dəyişiklik göstərmir.
Bu o deməkdir ki, Putin birmənalı olaraq danışıqlara hazırlaşmır – o, dünyanı aldatmağa davam etməyə hazırlaşır. Deməli, həyata dəyər verən hər kəsin birgə təzyiqi olmalıdır – təcavüzkara təzyiq. Rusiya əməllərinə görə cavab verməlidir”.
1986-cı ildə Çernobılda baş verən nüvə fəlakətində 31 nəfər həlak olub. Fəlakət birbaşa və ya dolayısı ilə 200 min insanın ölümünə səbəb olub.
