Almaniya, Fransa və İngiltərənin İranla Cenevrədə xarici işlər nazirləri səviyyəsində görüş keçirəcəyi bildirilir.
Avropa.info xəbər verir ki, görüşdə əsas müzakirə mövzularının nüvə proqramı və regional gərginliklər olacağı gözlənilir.
13 iyundan etibarən İran və İsrail arasında artan gərginlik beynəlxalq diplomatik fəallığın artmasına səbəb olub. Almaniya mətbuatının yazdığına görə, Almaniya, Fransa və İngiltərə iyunun 20-də İsveçrənin Cenevrə şəhərində İranla xarici işlər nazirləri səviyyəsində görüş keçirəcək.
Xəbərlərə əsasən, görüşdə Avropa İttifaqının (Aİ) Xarici Siyasət və Təhlükəsizlik məsələləri üzrə Ali Nümayəndəsi Kaya Kallas da iştirak edəcək. Toplantının əsas gündəm mövzusu İranın nüvə proqramı ilə bağlı veriləcək təminatlar olacaq.
Zirvədə İranın nüvə fəaliyyətlərini yalnız mülki məqsədlərlə məhdudlaşdıracağına dair təminat verməsi gözlənilir.
Diplomatik mənbələrin verdiyi məlumata görə, Cenevrədə ilk mərhələdə Almaniya, Fransa, İngiltərə və Aİ rəsmiləri öz aralarında danışıqlar aparacaq, daha sonra isə İran nümayəndə heyəti ilə ayrıca bir görüş keçiriləcək. Görüşlərin Almaniyanın Cenevrədəki Daimi Nümayəndəliyində, ABŞ-la koordinasiyalı şəkildə baş tutacağı bildirilir.
İranın xarici işlər naziri Abbas Əraqçi BMT-nin İnsan Hüquqları Şurasında çıxışı zamanı İsrailin İrana qarşı hücumlarını sərt sözlərlə qınayıb. Əraqçi bildirib ki, İsrail həm mülki şəxslərə, həm də dinc nüvə obyektlərinə beynəlxalq hüquqa zidd hücumlar təşkil edir və bu hərəkətlər ağır hərbi cinayətlər kimi qiymətləndirilməlidir. O, İranın özünü müdafiə etmək hüququndan istifadə etdiyini vurğulayıb və BMT-yə üzv bütün ölkələri bu ədalətsizlik qarşısında məsuliyyət daşımağa və hərəkətə keçməyə çağırıb. Əks halda, beynəlxalq hüquq sisteminin təməllərinin sarsıla biləcəyi barədə xəbərdarlıq edib.
