“ATV telekanalının qadınların pensiya yaşı ilə bağlı mənimlə hazırladığı süjet 100 faiz kontekstdən çıxarılaraq saxtalaşdırılıb; bu addım ölkəyə nifrət yağdırmaq üçün pusquda duranların dəyirmanına su tökməkdir və mətbuata açıq qalan azsaylı deputatların da tezliklə danışmaqdan imtina etməsinə gətirib çıxaracaq”.
Avropa.info xəbər verir ki, bunu qadınların pensiya yaşı ilə bağlı verdiyi müsahibənin televiziya məkanında təhrif olunaraq yayımlanmasına qarşı özünün rəsmi və kəskin etirazını bildirərkən Milli Cəbhə Partiyasının (MCP) başqanı, deputat Razi Nurullayev deyib.
“100 Faiz Etmək Ağını Çıxarmaqdır, Böyük Kanal Deputatın Fikirlərini Saxtalaşdırıb”
Millət vəkili rəsmi statusuna rəğmən qarşılaşdığı media təxribatına və televiziyanın qeyri-peşəkar yanaşmasına sərt reaksiya verib:
“Əziz dostlar, nəzərinizə çatdırmaq istəyirəm ki, ATV-nin qadınların pensiya yaşı ilə bağlı mənimlə verdikləri süjet 100 faiz kontekstdən çıxarılıb. 100%. Heç olmasa 95% edərdiniz, lap 99% edərdiniz. 100% etmək ağını çıxarmaqdır. Bu boyda kanal Milli Məclisin deputatının fikirlərini yüz faiz saxtalaşdırıb verib. Çox təəssüf edirəm. Məndən müsahibə xahiş edən və götürən əməkdaşlardan biri ilə danışdım. Üzrxahlıq etdi, mən onu qəbul etmədim. Müsahibənin orijinal variantını da istədim”.
“Mətbuatdan Qaçan Deputatlara İndi Haqq Qazandırıram”
Açıq media siyasəti yürüdən vəzifəli şəxslərin bu cür hallarla qarşılaşdıqdan sonra fəaliyyət taktikalarını dəyişəcəyini vurğulayan partiya rəhbəri bildirib:
“Mən mətbuata açıq deputatam və çalışaram ki, zəng edən jurnalistlərin hamısına cavab verim. Bilirəm ki, bir çox vəzifəli şəxslər, deputatlar mətbuatdan qaçır və onlara haqq qazandırıram. Mətbuata açıq bir neçə deputat, vəzifəli şəxs qalıb. Onlar da tezliklə danışmaqdan imtina edəcəklər. Onsuz da pusquda dayanıb ölkəmizə nifrət yağdırmağa növbə tutan minlərlə şəxslər var. Onların dəyirmanına su tökmək kimə lazımdır?”.
“Hansı Addımı Atacağıma Hələ Qərar Verməmişəm”
Məsələ ilə bağlı hüquqi və ya inzibati müstəvidə atacağı gələcək addımları hələ dəyərləndirdiyini qeyd edən MCP başqanı telekanala müraciətini bu sözlərlə yekunlaşdırıb:
“Hansı addımı atacağıma qərar verə bilməmişəm hələ ki. Hazırda qərar verdiyim bu sözdür: Təəssüf edirəm ATV, çox təəssüf edirəm!”.
