Tailand Kamboca ilə sərhədində şiddətlənən qarşıdurmalara görə dörd sərhəd əyalətindən 100 mindən çox insanı təxliyə etdiyini açıqlayıb. Daxili İşlər Nazirliyi 100 672 nəfərin müvəqqəti sığınacaqlara yerləşdirildiyini, Səhiyyə Nazirliyi isə ölənlərin sayının 14-ə yüksəldiyini açıqlayıb.
Avropa.info xəbər verir ki, Cümə axşamı Tailand ordusu Kamboca ərazisindəki hədəfləri vurmaq üçün F-16 qırıcılarını yerləşdirib . Hər iki tərəfin artilleriya atəşi açdığı qarşıdurmalarda ən azı 11 mülki şəxs həlak olub.
Səhər saatlarında başlayan qarşıdurmada hər iki tərəf bir-birini günahlandırıb. Mübahisəli sərhəddə baş verən toqquşma qısa zamanda atıcı silahlardan atışlardan ağır artilleriya atəşinə çevrilib. Məlumata görə, toqquşmalar təxminən 209 kilometrlik bir xətt boyunca ən azı altı fərqli yerdə baş verib.
Tayland: Kamboca ağır silahlardan istifadə edir
Tailand ordusundan verilən açıqlamaya görə, Ubon Ratçathani əyalətinin Chong Bok və Phu Makhuea rayonlarında və Surin əyalətinin Phanom Dong Rak rayonunda cümə günü səhər saat 4 radələrində qarşıdurmalar yenidən başlayıb.
Açıqlamada Kamboca əsgərlərinin artilleriya və raket kimi ağır silahlardan istifadə etdiyi, Tailand əsgərlərinin isə cavab tədbirləri gördüyü qeyd edilib.
Son 13 ilin ən qanlı qarşıdurması kimi qeydə alınan bu hadisələr çərşənbə günü Tailandın Kamboca səfirini ölkədən çıxarmasından və öz səfirini Pnom Penhdən geri çağırmasından sonra baş verib.
Tailand minanın rəqib qoşunlar tərəfindən yeni yerləşdirildiyini iddia edərək, əsgərlərindən birinin minaya basdıqdan sonra bir əzasını itirməkdə Kambocanı günahlandırıb. Kamboca bu ittihamları rədd edib.
Tailand səlahiyyətliləri cümə axşamı baş verən qarşıdurmalarda ölənlər arasında 8 yaşlı uşağın olduğunu, 31 nəfərin yaralandığını bildirib.
Tailand: “Beynəlxalq hüquqa zidd hücum”
Taylandın baş naziri vəzifəsini icra edən Phumtham Wechayachai, “Münaqişə zonaları xaricində ağır silahlarla həyata keçirilən ayrı-seçkiliksiz hücumları qınayırıq. Bu güc tətbiqi beynəlxalq hüquqa ziddir” dedi. Wechayachai, Taylandın sülh yolu ilə həllə tərəfdar olduğunu, lakin “baş verənlərin təxribat olduğunu” və “özlərini müdafiə etmək məcburiyyətində qaldıqlarını” ifadə etdi.
Tailandın səhiyyə naziri Somsak Thepsuthin Surin əyalətində bir xəstəxananın artilleriya atəşinə tutulduğunu və bunun “müharibə cinayəti” kimi qiymətləndirilməli olduğunu bildirib.
Kamboca: Mülki itkilər, minlərlə insan təxliyə edildi
Kambocanın Oddar Meanchey bölgəsindəki Banteay Ampil rayonundan ən azı 1500 ailənin təhlükəsiz ərazilərə təxliyə edildiyi bildirilir. Yerli rəsmi Met Meas Pheakdey sosial mediada bir mülki vətəndaşın öldüyünü, beşinin isə yaralandığını açıqlayıb .
BMT Təhlükəsizlik Şurası toplanır
Qarşıdurmalardan sonra Birləşmiş Millətlər Təşkilatının Təhlükəsizlik Şurasının cümə günü toplanacağı açıqlanıb. ABŞ Dövlət Departamentinin sözçünün müavini Tommy Pigott zorakılıqdan dərin narahatlığını ifadə edərək , “Mülki əhali qorunmalı və tərəflər dərhal hərbi əməliyyatları dayandırmalıdır” dedi.
Böyük Britaniya Xarici İşlər Nazirliyi cümə axşamı Tayland və Kambocanın bəzi hissələrinə vacib olmayan bütün səyahətlərə qarşı xəbərdarlıq etdi.
