ABŞ ştatı qatil robot planından geri çəkilir

22:11 - 07 Dekabr

ABŞ-ın Kaliforniya ştatında yerləşən San Fransisko Polis İdarəsi (SFPD) hücum edənlərə qarşı ölümcül robotlardan istifadə etmək üçün icazə istəyib.

Keçən həftə şəhərin qanunvericiləri və nəzarət şurası tərəfindən qəbul edilən təklif polisə öldürə bilən robotlara giriş imkanı verəcək.

SFPD-nin bütün hərbi tipli avadanlığından necə istifadə etməyi planlaşdırdığını açıqlayan sənəddə departament yazıb ki, "robotlar yalnız xalqın və ya zabitlərin həyat itkisi riski qaçılmaz olduqda ölümcül güc seçimi kimi istifadə olunacaq".

Bununla belə, plan vətəndaş azadlıqları qruplarının sərt tənqidi ilə üzləşib.

Avropa.info xəbər verir ki, dekabrın 6-da təklifin dayandırılması üçün yekdilliklə səsvermədən sonra şura məsələni əlavə nəzərdən keçirmək üçün komitəyə göndərib.

Etirazçılar və bir neçə müxalifət idarə heyətinin üzvləri bələdiyyə binasının pilləkənlərinə toplaşaraq, bələdiyyəni qərarından dönməyə çağırıblar.

Orijinal təklif indi dəqiqləşdiriləcək və ya tamamilə dayandırılacaq.

Şəhər rəsmiləri bütün qərarların xalq tərəfindən veriləcəyini vurğulayıblar. Lakin bir düyməni basmaqla insanları öldürməyin mümkün olması fəalları hərəkətə keçirib.

Qərar vermə mexanizmində insani hisslərdən uzaqlaşacaqlarını deyən fəallar vəziyyəti “sürüşkən zəmin” kimi dəyərləndiriblər.

Səlahiyyətlilər öldürməyə qadir olan robotların yalnız ekstremal vəziyyətlərdə və xüsusi təlim keçmiş polislər tərəfindən istifadə ediləcəyini iddia edirlər.

ABŞ-ın Texas ştatında polis daha əvvəl də ölümcül robotlardan istifadə edib. 2016-cı ildə Dallas polisi iki zabiti öldürən və bir neçə nəfəri yaralayan snayperi öldürmək üçün C-4 partlayıcısı ilə silahlanmış robotdan istifadə edib.

Federal hökumət uzun müddətdir ki, yerli hüquq-mühafizə orqanlarına kömək etmək üçün hərbi təyinatlı texnika, kamuflyaj formaları, süngülər və zirehli maşınlar paylayıb.

Lakin bu il qəbul edilən Kaliforniya əyalət qanunu indi şəhər polis qüvvələrinin hərbi təyinatlı ləvazimatları inventarlaşdırmasını və onlardan istifadə üçün icazə almasını tələb edir.