Türkiyənin müdafiə nazirindən Suriyanın şimalına əməliyyat AÇIQLAMASI

12:17 - 09 Avqust

Türkiyənin beynəlxalq aləmdə artan nüfuzu ilə paralel olaraq Türkiyə ordusunun da məsuliyyət sahələrinin əhatə dairəsi genişlənir.

Avropa.info xəbər verir ki, bunu çərşənbə axşamı Ankarada Türkiyə səfirlərinin 13-cü konfransında çıxış edən Türkiyənin milli müdafiə naziri Hulusi Akar deyib.

Onun sözlərinə görə, müasir Türkiyə ordusu ən son texnoloji inkişaflardan və silahlardan istifadə edir.

Akar qeyd edib ki, dövlət sərhədinin mühafizəsinə xüsusi diqqət yetirilir. “Bu gün sərhəddəki keçid məntəqələrinin hər hansı birinə Ankara real vaxt rejimində nəzarət edir”, - nazir bildirib.

Suriya və İraq əraziləri də daxil olmaqla terrorla mübarizə mövzusuna toxunan Hulusi Akar Ankaranın yeganə məqsədinin cinayət və milli təhlükəsizliyə qarşı təhdidlərlə mübarizə olduğunu vurğulayıb.

“Terrorçular harada olmalarından asılı olmayaraq bizim üçün qanuni hədəfdir. Biz bütün qonşu ölkələrin ərazi bütövlüyünə və suverenliyinə hörmət edirik. Zərbələr sırf terrorçulara endirilir. Mülki əhalinin təhlükəsizliyinə xüsusi diqqət yetirilir”, - nazir bildirib.

Akar vurğulayıb ki, Ankara PKK terrorçuları ilə bu qanlı təşkilatın qonşu ölkələrdəki qolları arasında fərq qoymur. “Bizim üçün PKK YPG-yə bərabərdir”, - o vurğulayıb.

Türkiyə Müdafiə Nazirliyinin rəhbəri bununla bağlı bildirib ki, Ankara ölkənin cənub sərhədləri yaxınlığında terrorçuların nəzarətində olan zonanın formalaşmasına icazə verməyəcək.

“Türkiyə sərhədləri yaxınlığında terror “dəhlizi” olmayacaq!”, - deyə nazir əmin edib.

Eyni zamanda o, Ankaranın Rusiya və ABŞ-ın Suriya ilə bağlı razılaşmalar üzrə öhdəliklərini yerinə yetirməsini gözlədiyinə diqqət çəkib.

Akar daha sonra qeyd edib ki, bölgədə yaşayan heç bir etnik qrup Türkiyə üçün təhlükə kimi qəbul edilmir. “Biz terrora son qoymaqda qərarlıyıq. Kürdlər ərəblər kimi bizim qardaşlarımızdır. Bununla belə, millətlərarası qarşıdurma alovunu alovlandırmağa, region reallıqlarını təhrif etməyə çalışan qüvvələr var. Bu gün dezinformasiya axınından danışırıq”, - deyə türkiyəli nazir bildirib.

Nazir bildirib ki, aprelin 17-dən bu günə qədər təkcə İraqın şimalındakı "Pençe-Kilit" antiterror əməliyyatı zonasında 311 terrorçu zərərsizləşdirilib.

Hulusi Akar “taxıl dəhlizi” ilə bağlı razılaşmalara toxunaraq, 22 iyul tarixli razılaşmaya uyğun olaraq Ukrayna limanlarından ərzaq tədarükünün problemsiz davam edəcəyinə ümid etdiyini bildirib.