Çavuşoğlu İsrailə səfər etdi: İki dövlətli həllin sülhə aparan yeganə yol olduğuna inanırıq

  • 15:01 - 25 May

Türkiyə-İsrail dialoqunda müsbət gündəm fikir ayrılıqlarını konstruktiv şəkildə müzakirə etməyə imkan verəcək. 

Avropa.info xəbər verir ki, bunu Türkiyənin xarici işlər naziri Mövlud Çavuşoğlu Qərbi Qüdsdə danışıqlardan sonra israilli həmkarı Yair Lapidlə birgə mətbuat konfransında deyib. 

Türkiyə diplomatiyasının rəhbəri İsrail tərəfi ilə davamlı dialoqun vacibliyini vurğulayıb. 

Çavuşoğlu əmindir ki, Ankara və Təl-Əvivin həssas məsələlərdə bir-birinə hörmət göstərməsinə ehtiyac var ki, bu da təkcə iki ölkənin maraqlarına uyğun deyil, həm də regionda sülhə töhfə verir. 

Nazir bildirib ki, o, israilli həmkarı ilə regional gündəliyin aktual məsələlərini də müzakirə edib.

Fələstin-İsrail münaqişəsi mövzusuna toxunan Çavuşoğlu bildirib ki, Türkiyə uzun müddətdir davam edən problemin “iki xalq üçün iki dövlət” prinsipi əsasında həllinin tərəfdarıdır. "Biz inanırıq ki, bu prinsip regionda uzunmüddətli sülhə aparan yeganə yoldur", - nazir bildirib. 

Diplomatiya rəhbəri qeyd edib ki, o, israilli həmkarının diqqətinə və Türkiyənin İslamın hərəmi - Şərqi Qüdsdəki Əl-Əqsa məscidinin statusu ilə bağlı həssaslığını çatdırıb. 

Çavuşoğlu qeyd edib ki, ötən Ramazan ayında dövlət başçıları səviyyəsində qurulan dialoq sakitliyin qorunması səylərinə töhfə verib. 

“Ankara və Təl-Əviv dövlət qurumları, o cümlədən Xarici İşlər Nazirliyi səviyyəsində texniki müzakirələrin bərpa olunmasının zəruriliyi ilə bağlı yekdil fikirdədirlər. Biz İsraillə bütün sahələrdə əlaqələrin inkişafına təkan vermək, müxtəlif əməkdaşlıq mexanizmləri yaratmaq və mülki aviasiya sahəsində danışıqları bərpa etmək barədə razılığa gəldik”, - Türkiyə diplomatiyasının rəhbəri bildirib. 

Çavuşoğlu hesab edir ki, iqtisadiyyatların nisbi yaxınlığı və bir-birini tamamlayan xarakteri Türkiyə və İsraili təbii ticarət tərəfdaşı edib: "Pandemiya ilə bağlı çətinliklərə və keçmiş fikir ayrılıqlarına baxmayaraq, ticarət artmaqda davam edir". 

İsrailin xarici işlər naziri öz növbəsində qeyd edib ki, Türkiyə XİN rəhbərinin 15 ildə ölkəyə ilk səfəri təkcə diplomatiya və təhlükəsizlik sahəsində əməkdaşlığa deyil, həm də iqtisadi əlaqələrə töhfə verə bilər. 

Türkiyənin xarici işlər naziri Mövlud Çavuşoğlu Yaxın Şərqə iki günlük səfəri çərçivəsində bir gün əvvəl Ramallaha səfər edib və burada fələstinli həmkarı Riyad əl-Maliki ilə görüşüb.


Oxunma sayı: 1365

Oxşar yazılar