BMT İranı bu tələblərə əməl etməyə çağırdı – ABŞ-ı isə sanksiyaları ləğv etməyə...

09:59 - 15 Dekabr

BMT baş katibinin siyasi məsələlər üzrə müavini Rozmari Dikarlo Tehranı uranın zənginləşdirilməsi səviyyəsi ilə bağlı tələblərə əməl etməyə, Vaşinqtonu isə İrana qarşı tətbiq edilən sanksiyaları ləğv etməyə çağırıb.

Avropa.info xəbər verir ki, BMT Təhlükəsizlik Şurasının iclasında çıxış edən Dikarlo İranın nüvə proqramı üzrə Birgə Hərtərəfli Fəaliyyət Planı (JCPOA) üzrə Vyanada danışıqların bərpasını alqışlayıb.

“Noyabrın 29-da Vyanada JCPOA üzrə diplomatik səylər bərpa olundu. Danışıqlardakı vəziyyət onu göstərir ki, Plana tam qayıtmaq və bütün problemləri həll etmək üçün əlavə səylər və səbir tələb olunacaq”, - Dikarlo bildirib.

“Sizə xatırlatmaq istəyirəm ki, JCPOA-nın özü on ildən artıq davam edən diplomatik səylərin nəticəsidir. Bununla belə, səy buna dəyərdi. Plan Təhlükəsizlik Şurasının 2231 saylı 2015-ci il qətnaməsi ilə birlikdə nüvə silahının yayılmamasının təməl daşı və dialoq və diplomatiya vasitəsilə nəyə nail oluna biləcəyinə dair nümunə hesab olunur”, - deyə BMT baş katibinin müavini bildirib.

O ümid edib ki, hazırkı danışıqlarda Birləşmiş Ştatlar və İran JCPOA-nın imzalanmasına səbəb olan eyni ruhu və öhdəliyi nümayiş etdirəcəklər. BMT nümayəndəsi vurğulayıb ki, Planın tam və səmərəli həyata keçirilməsinə alternativ yoxdur.

“Bu baxımdan, mən də Baş katib kimi, Birləşmiş Ştatları Planda qeyd olunduğu kimi sanksiyaları ləğv etməyə və ya təxirə salmağa və İran İslam Respublikası ilə neft ticarəti üçün güzəşt müddətini uzatmağa çağırıram. ABŞ-ın Buşehr atom elektrik stansiyasında, Fordo stansiyasında və Arak reaktorunda həyata keçirilən bəzi mülki nüvə fəaliyyətləri üçün istisnaları genişləndirməsi də vacibdir ", Rozmari Dikarlo deyib.

O, təbii uranın müqabilində İrandan zənginləşdirilmiş uranın ixracına icazə verən müddəaların uzadılmasına çağırıb.

BMT nümayəndəsi xatırladıb ki, İranla bağlı sazişlərdə nüvə silahının yayılmaması, regional və beynəlxalq təhlükəsizlik kimi ümumi məqsədlərə dəstək verən müddəalar var.