Azərbaycan informasiya və hibrid müharibələri ilə üz-üzədir

Azərbaycan informasiya və hibrid müharibələri ilə üz-üzədir - Hikmət Hacıyev

20:19 - 11 Dekabr

Azərbaycan və Türkiyə bütün sahələrdə, o cümlədən informasiya sahəsində və mediada fəal və uğurla qarşılıqlı fəaliyyət göstərir. Bu əməkdaşlıq Ermənistanın işğalı altında olan Azərbaycan torpaqlarının azad edilməsi uğrunda gedən 44 günlük müharibə zamanı özünü açıq şəkildə büruzə verdi.

Avropa.info xəbər verir ki, bunu Azərbaycan Prezidentinin köməkçisi - Prezident Administrasiyasının Xarici siyasət şöbəsinin müdiri Hikmət Hacıyev İstanbulda Strateji Əlaqələr üzrə Beynəlxalq Zirvə Toplantısının (Stratcom Summit 21) açılışında çıxışı zamanı deyib.

“Döyüş günlərində Azərbaycanın və qardaş Türkiyənin media strukturlarının nümayəndələri həqiqət uğrunda çiyin-çiyinə dayanmış, regionumuzun həqiqətlərinin dünya ictimaiyyətinə çatdırılmasına çalışmışlar”, - deyə Hacıyev bildirib.

O qeyd edib ki, Azərbaycan müstəqilliyini əldə etdiyi ilk gündən dezinformasiya axınına müqavimət göstərib, saxta xəbərlərlə mübarizə aparıb. Azərbaycan rəhbərinin köməkçisi bildirib ki, hətta dünya strateji əlaqələr anlayışlarından zəif məlumatlı olanda da ölkəmizə qarşı hibrid və psixoloji müharibələr aparılıb.

H.Hacıyev ötən əsrin 90-cı illərinin əvvəllərində Ermənistanın Azərbaycana qarşı işğalçılıq siyasəti apardığı hadisələri xatırladıb. “O vaxt biz hələ müharibəyə hazır deyildik. Ermənistan işğal zonasını günü-gündən genişləndirir. Torpağın ələ keçirilməsi terror və ayrı-seçkiliklə müşayiət olundu. Eyni zamanda dünya işğalçı ölkəni deyil, Azərbaycanı qınadı. Ermənistan silahlı qüvvələri Azərbaycanın dinc sakinlərini qətlə yetirəndə baş verənlər dünyaya təhrif olunmuş prizmada təqdim olunurdu: guya erməniləri məhz azərbaycanlılar öldürürdü. Uydurma erməni soyqırımının isteriyası üzə çıxdı”, - deyə Azərbaycan dövlət başçısının köməkçisi bildirib.

Onun sözlərinə görə, Azərbaycan bütün bu illər ərzində öz hüquqları uğrunda mübarizə aparıb, Cənubi Qafqazla bağlı həqiqətləri dünya ictimaiyyətinə çatdırmağa çalışıb. “Biz başa düşdük ki, haqlı olmaq və ədaləti müdafiə etmək kifayət deyil.

Hacıyev Qarabağ müharibəsi zamanı erməni mətbuatının yalan xəbərlərinə diqqət çəkib: guya Türkiyənin F-16-ları Ermənistan Hərbi Hava Qüvvələrinin təyyarələrini vurub. “İrəvan bu dezinformasiyanı bütün dünyaya yaymağa və qardaş Türkiyəni ittiham etməyə çalışıb. Lakin faktlar bunun əksini təsdiq etdi”, - deyə Hikmət Hacıyev bildirib.

Hikmət hacıyevin sözlərinə görə, Bakı üçün bütün bu illər ərzində regionun reallıqlarını dünya ictimaiyyətinə çatdırmaq vacib idi.

Hacıyev Qarabağla bağlı ədalətli mövqedə Azərbaycanı dəstəklədiklərinə görə Türkiyə xalqına və qardaş ölkənin mətbuatına minnətdarlığını bildirib.

Hacıyev vurğulayıb ki, Qarabağ müharibəsi dövründə baş verən hadisələr strateji kommunikasiyaların əhəmiyyətini sübut edib.