Şuşa yaxınlığında hərbçilərimizə qarşı terror aktı həyata keçirən erməni Xankəndindədir - Rus sülhməramlılar terrorçunu separatçılara təhvil verib

20:31 - 13 Noyabr

Şuşa şəhərinin Daşaltı kəndinin yaxınlığında xidmət aparan Azərbaycan Azərbaycan hərbçilərinə qarşı terror aktı həyata keçirən Nrayr Mirzoyan Xankəndidəki separatçılara təhvil verilib.

Avropa.info xəbər verir ki, bu haqda erməni mediası məlumat yayıb.

Məlumatda bildirilir ki, terror aktından sonra Rusiya sülhməramlıları tərəfindən saxlanılan 1975-ci il təvəllüdlü Nrayr Mirzoyan Xankəndidəki “istintaq komitəsi”ndə saxlanılır.

Hadisənin video görüntülərinin yayılması və Nrayr Mirzoyanın açıq şəkildə terror aktı həyata keçirməsinin məlum olmasına baxmayaraq, erməni tərəfi xüsusi həyasızlıqla iddia edir ki, baş vermiş "insident"də Azərbaycan tərəfi "günahkardır". Həyasızlıqlarını davam etdirən ermənilər hadisə ilə bağlı hətta cinayət işi açdıqlarını da bildiriblər.

Qeyd edək ki, bu gün Baş Prokuroluq və Daxili İşlər Nazirliyi erməni terrorçuların hərbçilərimizə qarşı təxribatı barədə məlumat yayıb.

Avropa.info-ya daxil olan birgə məlumatda bildirilir ki, 13 noyabr 2021-ci il tarixdə saat 07:12-də Azərbaycan Respublikasının Xankəndi şəhərindən Xankəndi-Laçın şosse yolu ilə 48-MN-048 ER dövlət qeydiyyat nişanlı "Mercedes Benz" markalı avtomobillə Laçın şəhəri istiqamətində hərəkətdə olan Ermənistan Respublikasının vətəndaşı, 1975-ci il təvəllüdlü Norayr Mirzoyan və qeyriləri cinayətkar birlik halında "RQD-5" markalı əl qumbarası və digər odlu silah, partlayıcı maddələr əldə edib gəzdirməklə Azərbaycan Respublikasının ərazisində terror aktı törətmək, habelə qəsdən adam öldürmək məqsədilə idarə etdiyi avtomobildən düşüb Şuşa şəhərinin Daşaltı kəndinin yaxınlığında xidmət aparan Azərbaycan Respublikasının Silahlı Qüvvələrinin N saylı hərbi hissəsinin və Rusiya Federasiyasının sülhməramlı kontingentinin hərbi qulluqçularının həyatını təhlükəyə atmaqla əl qumbarasını onların istiqamətində atmış, nəticədə müddətdən artıq həqiqi hərbi xidmət hərbi qulluqçusu, çavuş Hafiz Nəsibova və digərlərinə (cəmi üç nəfərə) müxtəlif dərəcəli bədən xəsarətləri yetirməklə milli düşmənçilik niyyətilə qəsdən öldürülmələrinə cəhd edib.

Azərbaycan Respublikası Baş Prokuroru tərəfindən fakta görə Cinayət Məcəlləsinin 29, 120.2.1 (bir qrup şəxs, qabaqcadan əlbir olan bir qrup şəxs, mütəşəkkil dəstə və ya cinayətkar birlik (təşkilat) tərəfindən adam öldürməyə cəhd), 29, 120.2.3, (zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürməyə cəhd), 29, 120.2.4 ( xüsusi amansızlıqla və ya ümumi təhlükəli üsulla adam öldürməyə cəhd), 214.2.3 (terrorçuluq-odlu silahdan və silah qismində istifadə olunan predmetlərdən istifadə etməklə törədildikdə), 228.3 (qanunsuz olaraq odlu silah, partlayıcı maddə əldə etmə, başqasına vermə, satma, saxlama, daşıma və gəzdirmə mütəşəkkil dəstə tərəfindən törədildikdə) və digər maddələri ilə cinayət işi başlanmaqla istintaqın aparılması Baş Prokurorluğun İstintaq idarəsinə həvalə edilib.

Hazırda iş üzrə intensiv istintaq-əməliyyat tədbirləri aparılır.