Deputatdan Nazirlər Kabinetinə müraciət: Su problemini həll edin!

16:29 - 01 İyul

“Havalar istiləşdikcə, Neftçala camaatının rahatlığını əlindən alan, onların zəhmətini heçə çıxaran, yaşayışlarını pozan qayğılar da çoxalır”.

Avropa.info xəbər verir ki, bu barədə Milli Məclisin deputatı Sabir Rüstəmxanlı özünün sosial şəbəkə profilində yazıb.

Deputat bildirib ki, artıq yarım aya yaxındır hər gün rayondan həyəcanlı zənglər gəlir:

“Kürün suyunun azalmasıyla, keçən il olduğu kimi, bu il də Xəzərin suyu çay yatağını doldurub, adamlar yenə su maşınlarının ümidinə qalıb, heyvan-qara qırılır, duzlu dəniz suyu çay yuxarı qalxaraq Salyan ərazisinə yaxınlaşmaqdadır və s.

Gözlənilməz xəbər deyil, ağlı olan hər kəs keçən ilki faciəli durumun bu il də təkrarlanacağını bilirdi. Çünki təbiətin bizi üzləşdirdiyi bu çətinliyin qarşısını almaq üçün lazım olan işlər görülməyib, vədlər yerinə yetirilməyib, çayın, dənizin dilini bilən yerli insanların təklifləri nəzərə alınmayıb”.

Həmin təklifləri burda bir daha təkrarlamaq istəmədiyini söyləyən S.Rüstəmxanlı qeyd edib ki, düzdür dövlət ötən yay rayon camaatını susuzluqdan xilas etmək üçün qısa müddətdə mümkün olan bütün vasittələrə əl atdi:

“Bütün qonşu rayonların su maşınları Neftçalaya yönəldildi, cəmi bir neçə ay ərzində Neftçala şəhərinə su kəməri çəkildi və hər kəs arxayınlaşdı. Lakir bu rayon təkcə Neftçala şəhərindən ibarət deyil və təəssüf ki, şəhərin də su şəbəkəsi yarıtmaz vəziyyətdədir, təzələnməlidir, tamamlanmalıdır....

Neftçala camaatı çörəyini daşdan, dənizdən, sudan çıxarmağa vərdiş eləmiş, hər çətinliyə əyilməyən, dövlətə, dövlətçiliyə bağlı, qanuna sayqı göstərən camaatdır... Köhnə müəssisələrin dağılmasına, işsizliyə dözür, ancaq susuzluğa dözmək mümkün deyil”.

Bir daha Nazirlər Kabinetinə, əlaqədar dövlət qurumlarına mürüciət edən deputat qeyd edib ki, yağış yağacağına, Kürün yenidən aşıb-daşacağına ümid bəsləməsinlər:

“Dünyada təbii su ehtiyatları bizdən qat-qat az olan ölkələr, dövlətlər var. Su məsələsini necə həll edirlər? Öyrənmək çətin deyil. Bir yayı, iki yayı birtəhər yola verməklə iş bitməz. Aran rayonlarımızın su problemini əsaslı şəkildə həll etmək lazımdır”.