Bakı Ali Neft Məktəbində tələbə və gənc tədqiqatçıların II Beynəlxalq elmi konfransları keçiriləcək

  • 11:59 - 07 Aprel

Bakı Ali Neft Məktəbinin (BANM) təşkilatçılığı ilə ümummilli lider Heydər Əliyevin anadan olmasının 98-ci ildönümünə həsr olunmuş tələbə və gənc tədqiqatçıların II Beynəlxalq elmi konfransları bu il aprel ayında keçiriləcək.

BANM-dan Avropa.info-ya bildirilib ki, “Kimya və kimya mühəndisliyində dayanıqlı inkişaf” konfransı aprelin 13-dən 16-dək təşkil ediləcək. Konfrans “Ekoloji problemlər və biotexnologiya”, “Neft-qaz və neft-kimya prosesləri”, “Mütərəqqi materiallar və polimerlər”, “Bərpaolunan enerji” bölmələrini əhatə edəcək.

Aprelin 20-dən 22-dək keçirilməsi nəzərdə tutulan “Neft-qaz geologiyası və mühəndisliyi” konfransı çərçivəsində “Quyuların istismarı, yataqların işlənməsi və hasilatın optimallaşdırılması”, “Quyuların planlaşdırılmasının və qazma əməliyyatlarının təkmilləşdirilməsi”, “Neft-qaz axtarışı və kəşfiyyatı və hövzə analizi”, “Neft-qaz çıxarma və nəqletmə proseslərində enerjinin qorunma texnologiyaları”, “Neft-qaz sahəsində iqtisadi səmərəliliyinin analizi” bölmələri üzrə müzakirələr aparılacaq.

Aprelin 27-28-də “Proseslərin avtomatlaşdırılması və informasiya təhlükəsizliyi - 2021” konfransı baş tutacaq. Konfransın proqramına “Ölçmə və idarəetmə sistemləri”, “Sistemli analiz və modelləşdirmə”, “İntellektual sistemlər və idarəetmə”, “Əşyaların interneti (İoT) və robototexnika”, “Təsvirlərin və siqnalların emalı”, “İrihəcmli verilənlərin, maşınla öyrətmənin və süni-intellektin sənaye tətbiqi”, “Şəbəkələr və bulud texnologiyaları”, “Sənaye şəbəkələrində informasiya təhlükəsizliyi” və “Kibertəhlükəsizliyin problemləri” bölmələri daxildir.

Konfranslara yerli və xarici təhsil müəssisəsindən tələbə və gənc tədqiqatçılar tezislər təqdim ediblər. Ümumilikdə konfranslara 300-ə qədər tezis qəbul edilib.

Qeyd edək ki, artıq ikinci ildir konfranslar beynəlxalq səviyyədə və onlayn keçirilir.


Oxunma sayı: 936

Oxşar yazılar