“Qoy siyasətçilər siyasət ilə, həkimlər də virusla məşğul olsun” - Deputat Razi Nurullayev

  • 13:17 - 03 İyul

“Operativ Qərargahın tərkibinə baxdım və bildim ki, qərar verənlər kimdir. Hamısı bizim hörmətli dövlət nazirlərimiz, hökumətin digər hörmətli üzvləri. Üç nəfərdən başqa da heç kimin nə tibbə aidiyyatı var, nə də virusa”.

Bu sözləri Avropa.info-ya millət vəkili Razi Nurullayev deyib. 

“Qərarlar da belə olmalı idi”, deyən deputat, “hələ yaxşı ki, daha pis günə düşməmişik”, deyə vurğulayıb:

“Bu tərkib verilən tapşırıqların, hökumətin göstərişlərinin, Prezidentin qərarlarının vətəndaşlar tərəfindən icra edilməsinə nəzarət edənlərdir və pis-yaxşı da edirlər. Amma, o tərkibdə olanlar xəstəlik və virusla, onun müalicəsi ilə, yayılmasının qarşısının alınması ilə bağlı düzgün qərar verə bilməzlər.

Virusun müalicəsi, yayılmasının qarşısının alınması, vətəndaş davranışı və onlara tətbiq olunacaq məhdudiyyətlərin siyahısını başqa qurum hazırlamalı və Operativ Qəragaha təsdiq üçün təqdim etməlidr və iki qurumun iştirakı ilə qərarlar müəyyən edilməlidir”.

Razi Nurullayev bildirib ki, qoy siyasətçilər siyasət ilə, həkimlər də virusla məşğul olsunlar:

“Bu qədər bəsitdir hər şey! Baş infeksionist Cəlal İsayev ancaq mətbuatla işləyir, sözünü orada deyir, belə çıxır ki, onu dinləyən, ondan məsləhət istəyən yoxdur, baş epidemioloq İbadulla Ağayev gedib oturub bir ucqar kənddə, heç televizoru və interneti də yoxdur. Onda günah varmı? Xeyr, çünki, ona deyən var ki, ay İbadulla müəllim, baş epidemioloqsan, gəl məsləhət ver, yol göstər”.

Millət vəkili məsələylə bağlı hökumətə səslənib:

“Mən hökumətə səslənirəm: təcili olaraq həkimlərdən, epidemioloq, infeksionist və mütəxəssislərdən ibarət yeni bir tərkibin yaradılmasına ehtiyac var, məsuliyyəti onların üzərinə qoyun. İnanıram ki, onlar park və bulvarları bağlayıb, insanları evə qapatmaz və insanlar da evlərdə kütləviliklə toplaşıb bir-birini yoluxdurmazdılar. Onların verdiyi tövsiyyələr insanların iki saatlıq maskaları həftələrlə geyinib sadəcə görüntü yaratmağa səbəb olmazdı.

Hərəkət zamanıdır. Paylaşın! Mətbuat nümayəndələrindən də yayılmasını xahiş edirəm”.


Oxunma sayı: 2542

Oxşar yazılar