Nabranda psixoloqu öldürən şəxs məhkəmə qarşısında

  • 15 Yan - 2020

Xaçmaz rayonunun Nabran qəsəbəsində qətl törətməkdə təqsirləndirilən Taleh Mürsəlovun cinayət işi üzrə məhkəmə iclası başlayıb. 

Avropa.info oxu.az-a istinadən xəbər verir ki, Bakı Ağır Cinayətlər Məhkəməsinin hakimi Eldar Mikayılovun sədrliyi ilə keçirilən prosesdə təqsirləndirilən şəxsin anket məlumatları dəqiqləşdirilib. 

Məhkəmənin baxış iclası yanvarın 21-nə təyin edilib. 

Qeyd edək ki, cinayət ötən il avqustun 16-da axşam saatlarında törədilib.

55 yaşlı psixoloq Tərlan İbrahimovun tanınmaz hala salınan cəsədi qətldən iki saat sonra küçədə, kiçik mağazanın qarşısında tapılıb. Avqustun 17-nə keçən gecə xəfiyyələr şübhəli şəxsin izinə düşərək həbs ediblər.

Qatil rəsmi işi olmayan yerli sakin Mürsəlov Taleh Əbdülrəşid oğludur. Cinayətkar öz evində saxlanılıb.

İlkin dindirmə zamanı saxlanılan şəxs törətdiyi əməli etiraf edib.

Psixoloq kimi fəaliyyət göstərən T.İbrahimov Bakıda yaşayıb. O, hər il Nabranda istirahət etmək üçün ev icarəyə götürüb. Yerli sakinlər onu gülərüz və nəzakətli şəxs kimi tanıyıb.

İlkin məlumata əsasən, həmin axşam T.İbrahimov içkili olan Taleh Mürsəlova yaxınlaşıb və yaşca böyük kimi, ona özünü alkoqolla məhv etməməyi tövsiyə edib. Lakin dialoq baş tutmayıb. T.Mürsəlov əvvəlcə psixoloqun baş nahiyəsinə yumruqla vurub, daha sonra yaxınlıqda mişar daşı taparaq qurbanının başına bir neçə ağır zərbə endirib.

Sonra qatil qanlı daşı cəsədin yanına ataraq hadisə yerindən uzaqlaşıb.


Oxunma sayı: 3466

Oxşar yazılar