Mətbuat Şurası AzTV-nin əməkdaşı ilə bağlı Rusiyaya müraciət etdi

  • 11:56 - 04 Dekabr

Mətbuat Şurası AzTV-nin Rusiyadakı xüsusi müxbiri Zakir Musayevin ermənilər tərəfindən təzyiqə məruz qalması ilə bağlı Rusiya Jurnalistlər İttifaqına müraciət ünvanlayıb.

Avropa.info xəbər verir ki, Zakir Musayev Rusiyanın Krasnodar vilayətinin Armavir şəhərində peşə fəaliyyətini yerinə yetirərkən təzyiqə məruz qalıb. Bununla bağlı Mətbuat Şurasının Rusiya Jurnalistlər İttifaqına müraciəti dərc olunub.

Müraciətdə bildirilir ki, Armavir şəhərində erməni terrorçusu, Böyük Vətən Müharibəsi illərində nasist Almaniyasının təşkil etdiyi legionda Sovet İttifaqına qarşı döyüşmüş Qaregin Njdeyə xatirə lövhəsi qoyularkən bu, yerli ictimaiyyətin mənfi reaksiyasına səbəb olub. Z.Musayevin məsələ ilə əlaqədar ötən ay hazırladığı reportaj onun çalışdığı Azərbaycan Televiziyasında yayımlanıb. “Kəskin etirazın nəticə olaraq sözügedən xatirə lövhəsi sökülüb. Z.Musayev isə bununla bağlı yenidən reportaj hazırlayarkən təxminən 50-dək erməni onu mühasirəyə alıb, çəkiliş qrupunun kamerasını sındırıb, jurnalistin komputerini əlindən almağa cəhd göstərib. Aqressiv dəstə hətta polisin xəbərdarlığına da məhəl qoymayıb. Buna görə, söz və ifadə azadlığını boğmağa, jurnalistin peşə fəaliyyətinə zorakı üsullarla mane olmağa yönələn bu hadisə Azərbaycan cəmiyyətində, eləcə də media ictimaiyyətində dərin hiddət və təəssüf hissi doğurub.

Şura Rusiya Jurnalistlər İttifaqından xahiş edir ki, oxşar halların gələcəkdə təkrarlanmaması baxımından baş vermiş hadisəyə qanun çərçivəsində layiqli qiymətin verilməsi təmin edilsin:

“Əminik ki, nəinki Rusiyanın, eləcədə dünyanın aparıcı media qurumlarından olan Rusiya Jurnalistlər İttifaqı məsələyə münasibətdə adekvat hüquqi tədbirin seçilməsinə öz dəstəyini əsirgəməyəcəkdir. Sizdən bununla bağlı müvafiq kömək göstərməyinizi xahiş edirik”.


Oxunma sayı: 5963

Oxşar yazılar