Bu məktəb üçnövbəli sistemə keçib: Valideynlər şikayətçidir

  • 17 Sen - 2019

Xırdalan şəhər 9 nömrəli tam orta məktəbdə üçüncü növbənin tətbiqi valideynlərin narazılığına səbəb olub.

Bu barədə Lent.az -a məlumat verən IV sinif şagirdlərinin valideynləri bildiriblər ki, bunun üçün etirazlarını bildirsələr də, müraciətləri nəzərə alınmayıb:

“Övladımız dərsə 3-ə qalmış gedib, 8-ə işləmiş çıxır. Bu onların həm yuxu rejiminə, həm təhsilinə, həm də ki, qidalanmasına pis təsir göstərir. Bir neçə dəfə bununla bağlı rəhbərliyə müraciət etmişik, cavabda isə deyirlər ki, məktəbdə uşaq çoxdur, yer olmur. Axı hamımız bilirik ki, səhər saatlarında uşaqlar daha yaxşı informasiyanı qavrayırlar, günortadan sonra isə bu eyni olmur, üçüncü növbədə isə vəziyyət daha da pisləşir. Biz sadəcə istəyirik ki, ən azından ibtidailər üçüncü növbəyə salınmasın, bunu dəyişə bilərlər”.

Mövzu ilə bağlı 9 nömrəli tam orta məktəbdən bildiriblər ki, artıq bir neçə ildir ki, məktəb üç növbəli sistemi tətbiq edib:

“Məktəbə müraciətlər çox olur. Valideynləri geri qaytarmaq mümkün deyil, çünki gedib şikayət edirlər. Ona görə də onların övladlarını qəbul edirik.

Tək bizdə yox, hər yerdə məktəblər 3 növbə ilə işləyir. Siniflərin hamısı eyni növbədə olur. 4-cü siniflərin hamısı da günortadır. Eləcə də VIII, IX, X, XI siniflər səhər növbəsindədirlər”.

Təhsil eksperti Kamran Əsədov isə bildirib ki, məktəbdəki növbəni şagird sayına görə Pedaqoji Şura müəyyən edir:

“Hər bir məktəb burada müstəqildir. Elə bir qayda yoxdur ki, məktəb ya birnövbəli, ya ikinövbəli, ya da ki, üçnövbəli olsun. Bu tamamilə məktəbdən asılı olan məsələdir”.

Qeyd edək ki, mövzu ilə bağlı Təhsil Nazirliyinə sorğu göndərmişik. Sorğumuza cavab verildiyi zaman bunu sizinlə bölüşəcəyik.


Oxunma sayı: 617

Oxşar yazılar