Kredit şərtləri dəyişir – “Zaminlərin öhdəliyi olmayacaq”

12:33 - 24 May

Problemli kreditdə zamin olanlar yeni restrukturizasiya olunan kreditdə artıq zamin olmayacaqlar

İqtisadçı ekspert Vüqar Bayramov yeni qaydalara əsasən restrukturizasiya olunan problemli kreditlərdə zaminliyə xitam verilməsi məsələsinə aydınlıq gətirib.

Avropa.info-nun məlumatına görə, ekspert artıq bir sıra problemli kreditlərin restrukturizasiyasına başlanıldığını deyib:

“Son 2 gündə bizə bu məsələ ilə bağlı ən çox ünvanlana sual belədir: yeni qaydalara əsasən restrukturizasiya olunan kreditlərdə zaminliyə xitam veriləcəkmi? Fiziki şəxsin kredit borcunun əsas məbləği 17 min manatdan azdırsa və həmin xətt üzrə gecikmə müddəti 360 gündən çoxdursa, həmin şəxslərə restrukturizasiya prosesləri çərçivəsində, gecikmədə olan kreditini bağlamaq məqsədilə 5 il müddətinə (1 il güzəşt müddəti ilə) 1% dərəcəsi ilə yeni kredit təklif olunur. Yeni mexanizmə görə, bank restrukturizasiya çərçivəsində yeni kredit xəttinə daha ağır şərtlər daxil edə bilməz. Eyni zamanda, əgər bank kredit xəttinin restrukturizasiya olunması barədə qərar verərsə və yeni müqavilə bağlanarsa, o zaman əvvəlki kreditdə zamin duranların zaminliyinə xitam verilir. Yəni, problemli kreditdə zamin olanlar yeni restrukturizasiya olunan kreditdə artıq zamin olmayacaqlar”.

Vüqar Bayramov qeyd edib ki, əgər bank restruktrizasiya olunacaq problemli kreditin yeni şərtləri ilə bağlı kredit götürən vətəndaş ilə razılıq əldə etməzsə, o zaman bank restrukturizasiya müqaviləsi bağlamaya bilər:

“Şərtlər əvvəlki kredit xəttindən ağır olmamalıdır, amma qaydalara əsasən restrukturizasiya üçün bank ilə müştərinin öncədən razılığına ehtiyac var. Amma əgər restrukturizasiya müqaviləsi bağlanacaqsa, o zaman zaminlər artıq zamin hesab olunmayacaqlar və onların heç bir öhdəliyi olmayacaq. Deməli, əgər siz zamin olmusunuzsa və həmin kredit xəttinin restrukturizasiya ilə bağlı yeni müqavilə imzalanıbsa, o zaman siz artıq zamin hesab edilmirsiniz və hətta yeni kredit üzrə gələcəkdə yubanma olsa da belə sizdən daha krediti götürənin əvəzinə ödəniş etmək tələb oluna bilməz”.