Şahmat üzrə rusiyalı dünya çempionu karyerasını başa vurub

  • 22:04 - 29 Yanvar
Şahmat üzrə 14-cü dünya çempionu Vladimir Kramnik karyerasını başa vurub. Rusiyalı qrossmeyster bu barədə Hollandiyanın Veyk-an-Zee şəhərində keçirilən “Tata Steel Chess” superturnirinin rəsmi saytına bildirib. “Peşəkar şahmatçı karyeramı başa vurmaqla bağlı qərarı bir neçə ay öncə vermişəm. İndi sonuncu turnirimi oynayandan sonra bunu elan etmək istəyirəm”, - deyə 44 yaşlı şahmatçı bəyan edib. Qeyd edək ki, Vladimir Kramnik 2006-cı ildə bolqarıstanlı Velesin Topalova qalib gələrək dünya çempionu olsa da, bir il sonra Şahmat Tacını hindistanlı Vişvanatan Ananda təhvil verib. Rusiyalı qrossmeyster “Tata Steel Chess” superturnirində Yorden van Forestlə birgə sonuncu - 14-cü pilləni bölüşüb. Yarışın qalibi norveçli Maqnus Karlsen olub. Turnirə qatılan Azərbaycan şahmatçılarından Teymur Rəcəbov 7-ci, Şəhriyar Məmmədyarov isə 12-ci yeri tutub.       report

Oxunma sayı: 6446

Oxşar yazılar