Təhsilin İnkişafı Fondunun İdarə Heyətinin keçmiş sədri Elnur Nəsibov bir neçə ay öncə bildirmişdi ki, 2025-ci ilin ilk yarısından gec olmayaraq Azərbaycanda müəllimlər üçün müəyyən güzəştləri özündə ehtiva edən təhsil kartlarından istifadəyə başlanılacaq. Onun işdən çıxmasından sonra qurum adından mətbuata verilən digər açıqlamada isə qeyd olunmuşdu ki, məktəbəqədər, ümumi, peşə, orta ixtisas və ali təhsil pillələrində çalışan pedaqoji və inzibati heyət üçün nəzərdə tutulan kart pillələr üzrə yeni tədris ilindən etibarən istifadəyə veriləcək.
Qeyd edək ki, təhsil kartları ilə müəllimlərə kafe və restoranlar, iaşə obyektləri, geyim və ərzaq mağazaları, gözəllik, sağlamlıq və tibbi xidmət mərkəzləri və s. istiqamətlərdə güzəştlər nəzərdə tutulur.
Yeni tədris ilinin bir ay yarımı geridə qalmasına baxmayaraq, sözügedən məsələ hələ də həllini tapmayıb.
Məsələ ilə bağlı Redaktor.az-a danışan Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru, təhsil eksperti İlqar Orucov bildirdi ki, Təhsilin İnkişaf Fondunun belə bir layihəsi mövcud idi və bu istiqamətdə hazırlıqlar gedirdi:
“Mən, doğrusu, hazırda həmin layihənin nə yerdə olması ilə bağlı məlumata malik deyiləm. Amma bütün hallarda düşünürəm ki, Azərbaycan müəllimləri üçün müəyyən güzəştlərin olması çox vacibdir. O, təkcə müəllimlər üçün deyil, eyni zamanda tələbələr üçün də böyük əhəmiyyətə malikdir. Biz dünyanın fərqli ölkələrində bu cür mənzərə ilə rastlaşırıq. Bu, əslində təhsilə olan münasibət deməkdir, bu, təhsilə olan qayğı deməkdir və eyni zamanda müəllim əməyinə önəm verilməsi deməkdir”.
Müsahibimiz ümid edir ki, belə bir layihə reallaşacaq:
“Çünki, qeyd etdiyim kimi, o, çox faydalı bir layihə ola bilər. Hazırda Təhsilin İnkişaf Fondunun rəhbərliyi dəyişib, amma hesab edirəm ki, hansısa qurumda rəhbər və kadr dəyişikliyi əvvəllər başlanılmış nəcib bir missiyaya, hansı ki, onunla bağlı hazırlıqlara start verilmişdi, son verilməsi üçün əsas ola bilməz. Bu mənada mən Elm və Təhsil Nazirliyinin müəllimlərə yönəlik bu aksiyaya dəstək verməsini arzu edərdim. Təbii ki, sualın sonunda qeyd edirsiniz: onun reallaşması lazımlıdırmı? Düşünürəm ki, bəli, lazımlıdır, həm də çox lazımlıdır”.
Qeyd edək ki, hazırda Təhsilin İnkişafı Fondunun İdarə Heyətinin sədri vəzifəsini müvəqqəti icra edən İlqar Bayramlıdır.
