Fransada 2021-ci ildə Manş boğazında ən az 31 qeyri-qanuni immiqrantın həyatını itirdiyi fəlakətdən məsul olan 13 şübhəli 6 aydan 10 ilə qədər həbs cəzasına məhkum edildi.
Avropa.info xəbər verir ki, Milli mətbuatda yer alan xəbərlərə görə, Paris Məhkəməsi 2021-ci ildə Manş boğazında baş verən miqrant fəlakəti ilə bağlı insan alverçilərinin mühakimə olunduğu işdə qərarını açıqlayıb.
Məhkəmə, ən azı 31 qeyri-qanuni immiqrantın həyatını itirdiyi hadisədə insan alveri ilə məşğul olan 4 İraq və 2 Əfqan müttəhimə “ehtiyatsızlıqdan ölümə səbəb olmaq” ittihamı ilə 6 ilə 10 il arasında həbs cəzası verib.
Məhkəmə iş üzrə mühakimə olunan digər 8 müttəhimdən birinə bəraət qazandırıb, 7 müttəhimə isə 6 aydan 4 ilə qədər həbs cəzası verib.
Məhkəmə həmçinin bu 7 müttəhimin əksəriyyətini mühacirlərin Fransada qeyri-qanuni yaşamasına kömək etməkdə təqsirli bilib.
Məhkəmənin qərarında insan həyatını heçə sayaraq xəsisliklə hərəkət edən şəxslərin 2021-ci ildə La-Manş kanalında “görünməmiş fəlakət”ə səbəb olduğu bildirilib.
Söz mövzusu fəlakətlə əlaqədar 7 Fransız əsgərinə qarşı “təhlükə altında olan insanlara kömək etmədikləri” səbəbiylə istintaq davam edir.
24 noyabr 2021-ci ildə Fransadan İngiltərəyə Manş boğazını keçməyə çalışan ən azı 31 qeyri-qanuni mühacir suda boğularaq öldü.
Aralarında 7 yaşlı qızın da olduğu immiqrantlar həddindən artıq yüklənmiş qayığa miniblər.
Həyatını itirənlər arasında İraq, Misir, Efiopiya, Somali və Vyetnamdan olan mühacirlər də var.
Fransa və Britaniya təcili xilasetmə qruplarına edilən zənglərə baxmayaraq, fəlakətdən yalnız bir iraqlı və bir somalili mühacir sağ qalıb.
