L
İndoneziyada avqustun 15-də baş verən 7,7 bal gücündə zəlzələdə həyatını itirənlərin sayı 68-ə yüksəlib.
Avropa.info xəbər verir ki, Səlahiyyətlilər, İndoneziyanın Flores bölgəsində baş verən zəlzələdən sonra aparılan işlərdə çatmaq çətin olan ərazilərdəki dağıntıların çoxunun çıxarıldığını və yolların yenidən nəqliyyata açıldığını bildirib.
Elektrik kəsilməsinin axtarış-xilasetmə işlərinə mane olduğuna diqqət çəkən səlahiyyətlilər, zəlzələdə həyatını itirənlərin sayının 68-ə yüksəldiyini, 213 nəfərin yaralandığını bildirdi.
Şərqi Nusa Tengqara əyalətinin qubernatoru Melki Laka Lena da açıqlamasında axtarış-xilasetmə, təxliyə, səhiyyə xidmətləri, sığınacaq, nəqliyyat və infrastruktur işlərinin sürətləndirilməsi məqsədilə 14 günlük “fövqəladə vəziyyət” elan edildiyini açıqlayıb.
İndoneziya Milli Fəlakət İdarəsi Agentliyinin (BNPB) sözçüsü Əbdül Muhari, fəlakət bölgəsinə təxminən 1500 təhlükəsizlik işçisinin təyin edildiyini və 275 ton humanitar yardımın paylanmaq üçün təyyarələrlə bölgəyə göndərildiyini açıqladı.
Muhari, zəlzələdən ən çox zərər çəkən Floresin Rutenq şəhərində iki səhra xəstəxanasının qurulduğunu bildirdi.
İtkin düşənlərin olmadığına diqqət çəkən Muhari, zəlzələdən zərər çəkmiş bölgələrdə axtarış-xilasetmə işlərinin davam etdiyini bildirib.
Avqustun 15-də İndoneziyanın Flores bölgəsində 7,7 bal gücündə zəlzələ baş verib və ən azı 235 afterşok qeydə alınıb ki, onların da ən böyüyü 6,2 olub.
Digər tərəfdən, Şimali Sumatra əyalətinin Pematangsiantar şəhəri yaxınlığında 6,9 bal gücündə daha bir zəlzələ baş verib.
Zəlzələ nəticəsində 900-dən çox ev dağılıb, 1300-dən çox ev qismən dağılıb, 5 minə yaxın insan müvəqqəti sığınacaqlara yerləşdirilib.
Torpaq sürüşməsi Flores bölgəsi boyunca yaşayış məntəqələrini birləşdirən təxminən 700 kilometrlik avtomobil yolunun hissələrini bağlayıb.
