Pentaqon ABŞ-ın keçmiş Hərbi Hava Qüvvələri naziri Frank Kendallın gizli məlumatlara çıxış imkanı yaradan təhlükəsizlik icazəsini ləğv edib.
Avropa.info xəbər verir ki, bu addım Qətər kral ailəsi tərəfindən ABŞ prezidenti Donald Trampa hədiyyə edilən təyyarənin xüsusiyyətlərinin mediaya sızması ilə bağlı atılıb. Məlumatı Pentaqonun İctimaiyyətlə Əlaqələr üzrə məsul şəxsi Şon Parnell açıqlayıb: “Pentaqon dərhal keçmiş Hərbi Hava Qüvvələri katibi Frank Kendallın təhlükəsizlik icazəsini və hər hansı bir həssas mövqe tutmaq imkanını ləğv edir. Bu addım prezident təyyarəsinin xüsusiyyətləri ilə bağlı mediaya icazəsiz şəkildə gizli məlumatların açıqlanması səbəbindən atılır”.
Kendall 2021-ci ildən 2025-ci ilə qədər Co Bayden administrasiyasında ABŞ Hərbi Hava Qüvvələri katibi vəzifəsində çalışıb.
Daha əvvəl The New York Times qəzetinin bir neçə jurnalisti Trampın yeni təyyarəsinin təhlükəsizlik baxımından qeyri-kafi təchiz oluna biləcəyini irəli sürən bir məqalə dərc etdikdən sonra məhkəməyə çağırış vərəqələri alıb. Qəzet jurnalistlərin Nyu-Yorkda böyük münsiflər heyəti qarşısında ifadə verməsi üçün çağırış vərəqələrini “Prezident Trampın medianı qorxutmaq cəhdlərinin fövqəladə dərəcədə artması” kimi qiymətləndirib. İyulun sonlarında ölkənin baş prokuroru vəzifəsini icra edən ABŞ Ədliyyə Nazirliyi məhkəməyə çağırış vərəqələrini geri götürüb.
Tramp isə jurnalistlərə bildirib ki, 2025-ci ildə Qətər kral ailəsindən hədiyyə edilən yeni təyyarəsi tezliklə əlavə təhlükəsizlik sistemləri ilə təchiz olunacaq və bu, təxminən bir ay çəkəcək.
Amerika lideri 8 iyulda Türkiyədə keçirilən NATO sammitini yeni təyyarə ilə deyil, köhnə təyyarə ilə tərk edib. “The Wall Street Journal” qəzetinin məlumatına görə, bu qərar ABŞ rəsmiləri İsraildən İrandan sui-qəsd təhdidi barədə kəşfiyyat məlumatı aldıqdan sonra verilib. Yeni təyyarə mümkün hücumlara qarşı mühafizə sistemi ilə tam təchiz olunmayıb.
