ADPU-nun nəzdində fəaliyyət göstərən Azərbaycan Dövlət Pedaqoji Kollecinin Yasamal korpusunda Korporativ Sosial Məsuliyyət layihəsi çərçivəsində “Baharın rəngləri – Novruzun nəfəsi” adlı sərgi keçirilib.
Avropa.info xəbər verir ki, sərgidə kollecin dekorativ-tətbiqi sənət, rəngkarlıq və dizayn-moda ixtisaslarında təhsil alan tələbələrin, eləcə də ixtisas müəllimlərinin hazırladıqları əl işləri vasitəsilə baharın təravəti, Novruzun zəngin milli-mənəvi dəyərləri və ənənələri bədii şəkildə təqdim olunub. Rəngarəng və yaradıcı nümunələr qonaqlar tərəfindən böyük maraqla qarşılanıb, iştirakçılarda xoş və yaddaqalan təəssüratlar formalaşdırıb.
ADK-nın rəhbəri Amaliya Sezgin tədbir iştirakçılarını salamlayaraq tədbirin mahiyyəti haqqında geniş məlumat verib və kürsüyə fəxri qonaq qismində Beynəlxalq Qalereyanın direktoru Elnurə İsgəndərovanı dəvət edib.
Elnurə xanım Amaliya Sezginin yüksək peşəkarlıqla təşkil etdiyi xeyriyyə aksiyasının təqdirəlayiq olduğunu bildirib və Azərbaycan Dövlət Pedaqoji Kollecinin kollektivinin onun üçün doğma olduğunu vurğulayıb. O qeyd edib ki, artıq 10 ildir Azərbaycan Rəssamlar İttifaqının üzvü, Beynəlxalq Qalereyanın üzvü, “Qabaqcıl təhsil işçisi” döş nişanlı Azərbaycan Dövlət Pedaqoji Kollecinin müəllimi Rəsmiyyə Mahmudova və tələbələri ilə birlikdə Ulu Öndər Heydər Əliyevin anadan olmasının ildönümlərinə həsr olunmuş vətənpərvərlik mövzusunda etüdlərlə Qarabağ və digər bölgələrdə, müxtəlif dövlət qurumlarında, həmçinin ölkəmizdə fəaliyyət göstərən xarici ölkələrin səfirlikləri ilə birgə keçirilən sərgilərdə fəal və uğurla iştirak edirlər.
Elnurə xanım Azərbaycan Dövlət Pedaqoji Kollecinin kollektivinə gələcək fəaliyyətlərində uğurlar arzulayıb.
Tədbirdə Azərbaycan Memarlıq və İnşaat Universitetinin Əcnəbi Dillər kafedrasının baş müəllimləri, Azərbaycan İlahiyyat İnstitutu yanında Bakı İlahiyyat Kollecinin direktoru Mehman İsmayılov, tədris hissə müdiri Hilalə İbadova, Beynəlxalq Qalereyanın direktoru Elnurə İsgəndərova, 18 saylı tam orta ümumtəhsil məktəbinin direktoru Leyla Fətiyeva, “Bağçam” uşaq bağçaları şəbəkəsinin baş direktoru Samirə Dünyamalıyeva, menecer Xalidə Rzayeva, “Yurdum” Eko-Sosial Kəndinin sədri Firəngiz Hüseynova və digər qonaqlar iştirak ediblər.
Aygün Oqtay
