Əfqanıstanda qanunla qadağan edilməsinə baxmayaraq gizli şəkildə davam edən “Baçə bazi” ənənəsi uşaq istismarının ən acı nümunələrindən biri kimi qalmaqdadır.
Avropa.info xarici KİV-ə istinadən xəbər verir ki, “uşaq oyunu” mənasını verən bu ənənədə əsasən kasıb ailələrin azyaşlı oğlan uşaqları hədəf alınır. Onlara qadın geyimləri geydirilərək toy və xüsusi məclislərdə oynadırlar. İnsan haqları hesabatlarına görə bu hallar çox vaxt cinsi istismar və zorakılıqla nəticələnir.
Əfqanıstan qanunvericiliyinə əsasən, “Baçə bazi” açıq şəkildə cinayət hesab olunur. Lakin bəzi yerli güc mərkəzlərinin himayəsi və dövlət nəzarətinin zəifliyi səbəbindən ənənənin tamamilə qarşısı alına bilmir.
Birləşmiş Millətlər Təşkilatı və UNICEF-in hesabatlarında “Baçə bazi” Əfqanıstanda ən ciddi uşaq hüquqları pozuntularından biri kimi göstərilir. Beynəlxalq ictimaiyyət hökumətdən daha sərt tədbirlər görməsini tələb etsə də, istismara məruz qalan uşaqların qorunması və reabilitasiyası istiqamətində ciddi çatışmazlıqlar qalmaqdadır.
