ABŞ prezidenti Donald Tramp ölkəsinin alyans vasitəsilə Ukraynaya silah ötürmək üçün NATO ilə razılaşdığını və bu silahların xərclərini NATO-nun qarşılayacağını bəyan edib.
Avropa.info xəbər verir ki, Tramp NBC News-a verdiyi müsahibədə ABŞ, NATO və Ukrayna arasında Ukraynaya veriləcək hərbi dəstəklə bağlı yeni razılaşmanın təfərrüatlarını paylaşıb .
ABŞ-dan göndəriləcək hərbi sursatların əvvəlcə NATO-ya, daha sonra isə NATO-nun bu silahları Ukraynaya verəcəyini bildirən Tramp, “Silahları NATO-ya göndəririk və NATO bu silahlara görə 100% ödəyir. Silahlar əslində NATO-ya gedir. NATO isə bu silahları Ukraynaya verir” dedi.
Tramp sözügedən razılaşmanın keçən ay keçirilən NATO Sammitində əldə olunduğunu vurğulayıb.
Eyni üsulun Patriot hava hücumundan müdafiə sistemləri üçün də keçərli olacağına işarə edən Tramp, “Patriot sistemlərini NATO-ya göndərəcəyik, sonra NATO onları paylayacaq” dedi.
Rusiya-Ukrayna müharibəsinə münasibət bildirən Tramp, “Rusiyadan məyus oldum, amma yaxın bir neçə həftədə nə olacağını görəcəyik” deyib.
Tramp həmçinin 14 iyul bazar ertəsi Rusiya ilə bağlı mühüm açıqlama verəcəyini bildirib .
Tramp ABŞ-ın əksər ticarət tərəfdaşı ölkələrə 15-20 faiz ümumi gömrük rüsumları tətbiq etməyi planlaşdırdığını bildirib və tətbiq edilən tariflərin çox müsbət qarşılandığını vurğulayıb.
Mövcud ümumi gömrük rüsumları 10 faizlə tətbiq edilir.
