İyulun 7-də layihə rəhbəri Aygün Əzizovanın təşəbbüsü ilə Dünya Şokolad Gününə həsr olunmuş sərgi Beynəlxalq Qalereyada təşkil olunub.
Sərgini Beynəlxalq Qalereyanın direktoru Elnurə İsgəndərova giriş sözü ilə açaraq sərgi iştirakçılarını salamlayıb:
“Hörmətli təşkilatçılar, dəyərli qonaqlar, əziz sənətsevərlər və hörmətli iştirakçılar!
Bu gün burada toplaşaraq yalnız bir mükafatlandırma mərasiminə deyil, həm də yaradıcılığın, zəhmətin və ilhamın qələbəsinə şahidlik edirik. Onlayn formatda keçirilən bu beynəlxalq rəsm sərgisi Beynəlxalq Qalereya, “World Art Club” və Birləşmiş Ərəb Əmirliklərində fəaliyyət göstərən “Medina Art Gallery”nin ortaq layihəsi olaraq incəsənətin sərhəd tanımadığını bir daha sübut etdi.
Nailə Rüstəmovanın rəhbərlik etdiyi “N.N Sweet” şirkətinin tərəfdaşlığı isə Aygün Əzizovanın layihə rəhbəri olduğu bu sərgiyə şirin bir ruh qatdı – həm sözün əsl, həm də məcazi mənasında.
Bu gün burada yalnız incəsənətin deyil, həm də şokoladın möcüzəli dünyasının təntənəsini qeyd edirik. Ümumdünya Şokolad Gününə həsr olunmuş onlayn rəsm sərgimiz dad və yaradıcılığın ahəngini bir araya gətirərək unikal bir sənət bayramına çevrildi.
Xüsusilə bu platformada azərbaycanlı rəssamlarımızın nümayiş etdirdiyi bacarıq, duyğu və fərdi bədii baxış bizə böyük qürur hissi yaşatdı. Onların əsərləri texnologiya vasitəsilə sərhədləri aşaraq, qitələr arasında sükut içində danışdı, hisslər ötürdü, qəlblərə toxundu.
Bugünkü mükafatlar sadəcə fiziki simvollar deyil. Onlar sənətin əzm, orijinallıq və ruhun dərinliklərinə səyahət etdiyini tanımağın bir göstəricisidir. Hər biriniz yalnız özünüzü deyil, eyni zamanda Azərbaycan incəsənətini də beynəlxalq səviyyədə təmsil etdiniz.
Azərbaycanlı iştirakçılarımız sərgidə incə zövqləri, yaradıcı təxəyyülləri və rənglərlə oynama bacarıqları ilə fərqləndilər. Onların əsərlərində şokolad yalnız bir qida deyil, bir simvola, bir duyğuya və bir hekayəyə çevrildi.
Əziz rəssamlar, bu mükafatlar sizin yaradıcılıq cəsarətinizin və sənətə olan sevginizin rəmzidir. Siz bu sərgi vasitəsilə bizə göstərdiniz ki, şirinlik təkcə damaqda deyil, eyni zamanda fırçanın yaratdığı əsərdə də mümkündür.
Unutmayın: hər bir fırça zərbəniz bir dünyadır. Və bu dünya yalnız bu gün deyil, sabah da danışacaq, ilham verəcək, düşündürəcək. Sizlər bizə göstərdiniz ki, incəsənət uzaqlıqları yaxın edir, dilləri susduraraq gözəlliklə ünsiyyət qurur.
Sizi təbrik edir, uğurlarınızın davamını diləyirəm. Qoy sənətinizin yolu hər zaman işıqlı olsun!” – deyə o qeyd edib.
Sərgidə Ağdamdakı Heydər Əliyev Mərkəzinin rəsm dərnəyinin müəllimi Samirə Hüseynova tələbələri ilə, “Şəhanə” Tədris Mərkəzinin rəhbəri Şəhanə Paşayeva tələbələri ilə, rəssam Abbas Əliyev, rəssam Kifayət Nəzərova, rəssam Lalə Camalzadə, rəssam Rəhilə Məhərrəmova, Azərbaycan Dövlət Rəssamlıq Akademiyasının müəllimi Zinaida Mirzəzadə və rəssam Aygün Qürbətova iştirak ediblər. İştirakçılar diplomlarla təltif olunublar. “N.N Sweet” şirkəti tərəfindən hər bir iştirakçıya xüsusi şokoladlar hədiyyə edilib.
Sonda xatirə fotoları çəkilib.
Aygün Oqtay,
Fotolar Camalındır
