“Prezident İlham Əliyevin Serbiyaya səfəri iki dost və tərəfdaş ölkə arasında münasibətlərin keyfiyyətcə yeni mərhələyə qədəm qoyduğunu nümayiş etdirir. Səfər çərçivəsində verilən bəyanatlar, keçirilən görüşlər və aparılan müzakirələr göstərdi ki, Bakı ilə Belqrad arasında əlaqələr artıq təkcə siyasi dialoq müstəvisində deyil, həm də iqtisadi, energetika, nəqliyyat və sərmayə sahələrində sistemli və uzunmüddətli strateji əməkdaşlıq xarakteri daşıyır”.
Bunu Avropa.info-ya açıqlamasında deputat Şahin Seyidzadə deyib.
Onun sözlərinə görə, Prezident İlham Əliyev bəyanatında xüsusi olaraq vurğuladı ki, Azərbaycan ilə Serbiya arasında təmaslar uzun illərdir davam edir. “Bu münasibətlər qarşılıqlı hörmət, etimad və səmimi dostluq prinsiplərinə əsaslanır. Bu amil dövlətlərarası münasibətlərin dayanıqlılığının əsas təminatıdır. Prezident İlham Əliyev Serbiya xalqının tarix boyu öz dövlət suverenliyinin qorunması və möhkəmləndirilməsi uğrunda göstərdiyi fədakarlıqları yüksək qiymətləndirib”, – o vurğulayıb.
Şahin Seyidazdə
O əlavə edib ki, səfər çərçivəsində Serbiya-Azərbaycan Strateji Şurasının birinci iclasının keçirilməsi münasibətlərin institusional əsasda daha da möhkəmləndirilməsinin göstəricisidir:
“Prezident İlham Əliyev bəyan etdi ki, iki ölkənin gələcək üçün açıq-aydın planları mövcuddur. Bu planlar siyasi dialoqun intensivləşdirilməsini, iqtisadi əməkdaşlığın genişləndirilməsini, energetika sahəsində birgə layihələrin reallaşdırılmasını və beynəlxalq platformalarda qarşılıqlı dəstəyin davam etdirilməsini əhatə edir. Xüsusilə diqqət çəkən məqamlardan biri enerji sahəsində əməkdaşlığın genişləndirilməsidir. Azərbaycan artıq bir müddətdir ki, Serbiyaya təbii qaz ixrac edir və tərəflər ixrac həcminin artırılması barədə razılığa gəliblər. Bu, Serbiyanın enerji təhlükəsizliyinin gücləndirilməsinə mühüm töhfə verir. Eyni zamanda, Serbiya idxal edilən qazı elektrik enerjisinə çevirərək həm daxili tələbatı ödəmək, həm də gələcəkdə ixrac imkanlarını genişləndirmək niyyətindədir.
Prezident İlham Əliyev Azərbaycanın energetika sahəsində ixrac potensialının hazırda 2 giqavat olduğunu, lakin bu göstəricinin yaxın illərdə əhəmiyyətli dərəcədə artacağını bildirdi. 2032-ci ilə qədər əlavə 8 giqavat enerji gücünün yaradılması planlaşdırılır ki, bunun da böyük hissəsi ixraca yönəldiləcək. Bu kontekstdə Avropa məkanı əsas ixrac istiqaməti kimi nəzərdən keçirilir. Deməli, Azərbaycan-Serbiya əməkdaşlığı təkcə ikitərəfli münasibətlər çərçivəsində deyil, həm də Avropanın enerji təhlükəsizliyi baxımından strateji əhəmiyyət daşıyır. Səfər zamanı elektrik stansiyasının birgə inşası məsələsi də müzakirə olundu. Prezident İlham Əliyev Azərbaycanın Serbiyaya böyük həcmdə sərmayə qoymağa hazır olduğunu bəyan etdi. Bu, Serbiyada mövcud olan əlverişli investisiya mühitinin nəticəsidir.
Aparılan islahatlar ölkəni xarici investorlar üçün cəlbedici edib və Azərbaycan bu prosesdə fəal tərəfdaş qismində çıxış edir. Enerji infrastrukturu layihələri hər bir ölkənin gələcək inkişafının təməlini təşkil edir. Xüsusilə təbii resursları məhdud olan ölkələr üçün daxili enerji istehsal gücünün mövcudluğu strateji təhlükəsizlik məsələsidir. Azərbaycan bu istiqamətdə Serbiya ilə əməkdaşlığı genişləndirməyi prioritet hesab edir. Prezident İlham Əliyev səfərin nəticələrinin tezliklə özünü göstərəcəyinə əminliyini ifadə etdi və yaxın gələcəkdə qarşılıqlı səfərlərin davam etdiriləcəyini bildirdi. O, Serbiya nümayəndə heyətini Azərbaycana dəvət etdi və iki ölkə arasında yüksək səviyyəli dialoqun davamlı xarakter alacağını vurğuladı.
Bu səfər göstərdi ki, Azərbaycan və Serbiya suverenlik, qarşılıqlı hörmət və strateji maraqlar əsasında əməkdaşlığın yeni mərhələsinə qədəm qoyublar”.
