“Prezident İlham Əliyevin “Konstitusiya və Suverenlik İli” ilə bağlı Amnistiya təşəbbüsü irəli sürməsidir. Xatırladım ki, Azərbaycan müstəqillik qazanandan indiyədək 117 min nəfərə şamil olunan 13 amnistiya aktı qəbul edilib ki, indiki bir növ 2021-ci ildə 8 Noyabr Zəfər Günü ilə bağlı reallaşdırılanın davamı sayıla bilər. Gözlənilən amnistiyanın əhatə baxımından özündən əvvəlkilərdən daha böyük olması, yəni 20 min nəfər üçün nəzərdə tutulması tam təbiidir. Çünki nəinki müstəqillik dönəmində, ümumiyyətlə son bir neçə yüz ildə Azərbaycan tarixində çağdaş sərhədlərimiz çərçivəsində suverenliyin tam təmini qədər önəmli heç bir hadisə baş verməyib. Bu salondakılara sirr deyil ki, suverenlik yoxdursa, əsl müstəqillikdən danışmaq mümkün deyil, o, sadəcə formal xarakter daşıyır”.
Avropa.info xəbər verir ki, bunu deputat Sahib Alıyev parlamentdə çıxışı zamanı deyib.
Deputat bildirib ki, azadlıq müharibəsi nəticəsində təkcə torpaqlarımızın işğaldan qurtarılması üçün aparılmırdı, Konstitisiyamızın təntənəsinə, suverenliyimizin təminə yönəlmişdi və ən çətin hissəsi məhz diplomatik müstəvidə cəbhədəkindən qat-qat güclü rəqiblərlə getdi: “Müzəffər Ali Baş Diplomatımızın qazandığı bu qələbə cəbhədəkinin davamı olsa da, əhəmiyyətliliyinə görə onu belə kölgədə qoyduğunu təəssüf ki, hələ tam dərk edə bilmirik. Bəlkə, buna da vaxt lazımdır, dağın böyüklüyü ondan uzaqlaşdıqca daha aydın görünür. Ancaq çox istərdim ki, nəinki amnistiyaya düşənlər, onların doğmaları, yaxınları, hər kəs bilsin ki, torpaqlarımız üzərində suverenliyimizin təmini bir daha vurğulayıram, müstəqilliyimizin elanından da böyük uğurdur.
Azərbaycan Prezidentinin dediyi o azadlıq müharibəsi bilmirəm fərqindərilər ya yox, bizə necə yanaşmalarından asılı olmayaraq bütün qonşularımız bütövlükdə Cənubi Qafqaz üçün də eyni mahiyyət daşıyır. Tarixdə ilk dəfədir ki, bu regionun geosiyasi subyekt kimi çıxış etmək şansı yaranıb, ümid etmək istərdim ki, xudbinliyi, bəzən büruzə verilən alverçi yanaşmasını bir qırağa qoyaraq bütün qonşularımız onu düzgün dəyərləndirəcəklər.
Qonşularımızdan söz düşmüşkən, sonda Ermənistan baş nazirinin imperiyanın oradakı və Qarabağdakı agentura şəbəkəsinin ötən əsrin sonunda başlatdığı Qarabağ hərakatıyla Qərbi Azərbaycan İcmasının fəaliyyətini eyniləşdirməsinə toxunmaq istərdim. Paşinyan bilməlidir ki, nə Azərbaycan dövləti, nə də Qərbi Azərbaycan icması onun ölkəsinə qarşı ərazi iddiasındadır. Biz kimdənsə torpaq istəmirik, amma o torpaqlar bizi istəyir, bizi çəkir və biz ora gedəcəyik, çünki məsələn, Ermənistanın keçmiş rəhbəri Levon Ter-Petrosyandan fərqli olaraq ora bizim yurd yerimizdir”.
