Bütün dünyada hər il dekabrın 3-ü Beynəlxalq Əlillər Günü kimi qeyd olunur. Bu günün məqsədi ictimai həyatın bütün sahələrində əlillərin hüquqlarının qorunmasına nail olmaq və ictimaiyyətin diqqətini onların problemlərinə yönəltməkdir.
Avropa.info xəbər verir ki, Cəfər Cabbarlı adına Respublika Gənclər Kitabxanasında 3 dekabr – Beynəlxalq Əlillər Günü ilə əlaqədar virtual kitab sərgisi hazırlanıb.
Kitabxana əməkdaşları tərəfindən hazırlanan virtual sərgidə Beynəlxalq Əlillər Gününün təsis edilməsi tarixi, məqsədi və vəzifələri, bu sahədə qəbul edilən rəsmi sənədlər, əlilliyi olan şəxslərin hüquqları, sosial müdafiəsi haqqında məlumatlar yer alır. Virtual sərgidə Azərbaycanda dövlət tərəfindən əlilliyi olan insanların sosial rifahının yüksəldilməsi istiqamətində görülən işlərin əsasının Ulu Öndər Heydər Əliyev tərəfindən qoyulması, fiziki cəhətdən qüsurlu insanlara göstərilən dövlət qayğısı, ölkəmizdə bu sahədə aparılan islahatlar haqqında məlumatlar təqdim edilir. Materialda “Heydər Əliyev Fondu”nun bu sahədə olan dəyərli fəaliyyəti, fiziki qüsurlu şəxslərin cəmiyyətin müxtəlif sahələrinə inteqrasiyasını, onların məşğulluq səviyyələrinin artırılması, rifahlarının yaxşılaşdırılması istiqamətində həyata keçirilən islahatlar haqqında geniş məlumat verilir, bu şəxslərin idman, yaradıcılıq sahəsində qazandıqları uğurları əks etdirən videogörüntülər nümayiş olunur. Kitabxananın rəsmi saytında https://ryl.az/multimedia/3-dekabr-beynelxalq-eliller-gunu yerləşdirilən materialda “Əlilliyi olan insanların əmək hüquqları”, “Funksionallıq, əlillik və sağlamlığın beynəlxalq təsnifatı”, “Əlillik məsələləri üzrə terminlərin izahlı lüğəti” kimi kimi kitablar da sərgilənir.
