Ölkəmizdə vətəndaş cəmiyyətinin inkişafına, ictimai təşəbbüslərin dəstəklənməsinə, media peşəkarlığının artırılmasına və ictimai dialoqun gücləndirilməsinə dəstək verən Media və Mülki Cəmiyyət İctimai Birliyinin təsis edilməsindən 20 il ötür. Bu münasibətlə Azərbaycan Respublikasının Milli Məclisinin İctimai Birliklər və Dini Qurumlar komitəsinin sədri Fazil Mustafa Birliyin rəhbərliyini, bütün üzv və tərəfdaşlarını təbrik edib. Həmin təbrikdə deyilir:
“Hörmətli Xanoğlan müəllim,
Sizi İctimai Birliyin 20 illik yubileyi münasibətilə səmimi-qəlbdən təbrik edir, yeni uğurlar arzulayıram.
“Media və Mülki Cəmiyyət” İctimai Birliyi Azərbaycan ictimaiyyətində sağlam düşüncənin təşəkkülünə, media savadlılığının artmasına və vətəndaş cəmiyyəti institutlarının güclənməsinə çalışması ilə seçilib. Birliyin həyata keçirdiyi çoxsaylı layihələr həm bölgələrdə həm də paytaxtda ictimai fəallığın, hüquqi və sosial maariflənmənin, gənclərin sosial məsuliyyətinin artmasına xidmət edib.
Dezinformasiya ilə mübarizə, media etikası, ictimai iştirakçılıq, hüquqi maarifləndirmə və Azərbaycan dilinin qorunması kimi strateji istiqamətlər üzrə həyata keçirilmiş layihələr birliyin nə qədər önəmli missiya daşıdığını bir daha təsdiqləyir. Bu fəaliyyətlər şəffaflıq, dialoq və ictimai nəzarət mühitinin genişlənməsinə təsir göstərməkdədir.
Əminəm ki, “Media və Mülki Cəmiyyət” İctimai Birliyi gələcək illərdə də media sektorunun inkişafı, vətəndaş cəmiyyətinin möhkəmlənməsi və demokratik dəyərlərin təşviqi istiqamətində yeni və daha genişhəcmli layihələr həyata keçirəcəkdir.
Birliyin yaradıcı təşəbbüslərinin əsasında duran peşəkar yanaşmaya, prinsipial ictimai mövqeyə və 20 illik ardıcıl əməyə görə Sizi, Birliyin bütün üzv və tərəfdaşlarını bir daha təbrik edir, yeni uğurlar diləyirəm!”
Hörmətli Fazil müəllimə səmimi təbrikinə və təşkilatımızın fəaliyyətinə verdiyi yüksək qiymətə görə dərin təşəkkürümüzü bildiririk.
