“Azərbaycan aslanı” – “Mixaylo”nun qəhrəmanlıq salnaməsi
Azərbaycanın azadlığı və təhlükəsizliyi uğrunda canından keçən qəhrəmanlarımızın həyat yolu şanlı bir məktəbdir – ləyaqət, vətənpərvərlik və şücaət məktəbi. Bu məktəbin yetirmələri olan qəhrəmanlar Vətənin bütövlüyü naminə yalnız öz həyatlarını deyil, bütün gələcəklərini də qurban verməyi bacaran iradə sahibidir. Onların simasında biz Azərbaycan əsgərinin qətiyyətini, qeyrətini, sarsılmaz ruhunu görürük. Belə igidlərdən biri də Xüsusi Təyinatlı Qüvvələrin cəsur zabiti, ölümün gözünə dik baxan kəşfiyyatçı, döyüş yoldaşlarının “Mixaylo” adlandırdığı kapitan Orucov Mühüd Qurban oğludur. Onun keçdiyi döyüş yolu, göstərdiyi fədakarlıq və Vətənə sarsılmaz sədaqəti Azərbaycan hərb tarixində silinməz iz buraxıb. Mühüd Orucovun həyat yolu yalnız bir əsgərin deyil, bütöv bir xalqın ruhunu, mübarizə əzmini və yenilməzliyini özündə əks etdirən bir həyat hekayəsidir.
Uşaqlıqdan zirvəyə gedən yol
Mühüd Orucov 1984-cü ilin 13 iyulunda Qazax rayonunun Fərəhli kəndində dünyaya göz açıb. İlk təhsilini 1991-ci ildə daxil olduğu K.Kərimov adına orta məktəbdə alıb. Uşaqlıqdan hərb sənətinə olan marağı onu 1999-cu ildə Cəmşid Naxçıvanski adına Hərbi Liseyə aparıb. Burada aldığı təhsil, tərbiyə və peşəkar hazırlıq onun xarakterində intizam, cəsarət və Vətən sevgisinin daha da möhkəmlənməsinə səbəb olub. Liseyi bitirdikdən sonra Mühüd Orucov 2002-ci ildə H.Əliyev adına Azərbaycan Ali Hərbi Məktəbinə daxil olur və 2006-cı ildə məktəbi qoşun kəşfiyyatı ixtisası üzrə bitirir. Ardınca 2006–2007-ci illərdə Təlim-Tədris Mərkəzində zabit hazırlığını tamamlayır.
Xüsusi Təyinatlı Qüvvələrə gedən yol
2007-ci ildə Müdafiə Nazirliyinin əmrilə “N” saylı hərbi hissədə kəşfiyyat taqım komandiri vəzifəsinə təyin olunan Mühüd, öz istəyi ilə Xüsusi Təyinatlı Qüvvələr kursuna göndərilir və kursu yüksək nəticə ilə başa vurur. Xidmətdə göstərdiyi uğurlara görə qısa zamanda Xüsusi Təyinatlı Qüvvələrin kəşfiyyat tabor komandiri olur. Hərbçi dostlarının dediyinə görə, Mühüd ən riskli istiqamətlərə, ən çətin əməliyyatlara könüllü gedən zabit idi. Bu səbəbdən döyüş yoldaşları ona “Mixaylo” ləqəbini veriblər. Bu ad yalnız ləqəb deyildi, Mühüdin şəxsi keyfiyyətlərinə verilən dəyər, onun döyüş ruhunun təcəssümü idi. Bir dəfə ezamiyyətdə olduğu hərbi hissədə bir hərbçi ona deyir: “Sən eşitmisən, deyirlər bir Mühüd adlı oğlan var, adına ‘Mixaylo’ deyirlər. Yaman qəhrəmandır. Bizim tərəflərdəndir deyə soruşuram, onu tanımırsan?” Mühüd gülümsəyib cavab verir: “Xeyr, heç rastlaşmamışam. Görsəm salamını çatdıraram”. Bu sadə dialoq onun təvazökarlığının ən gözəl nümunələrindəndir.
Mühüdin döyüş yolu və əfsanəyə çevrilən fədakarlığı
Xidməti dövründə Mühüd Orucov bir çox uğurlu məxfi əməliyyatlarda iştirak edib. Onun rəhbərliyi və iştirakı ilə düşmən təxribatlarının qarşısı dəfələrlə və vaxtında alınıb. Bu əməliyyatların bir çoxunun təfərrüatları bu gün də sirr olaraq qalır. 2014-cü ildə bir əməliyyatı xüsusi uğurla icra etdikdən sonra Prezident İlham Əliyev Mühüd Orucova xatirə olaraq saat hədiyyə etmişdi. Sonralar bu səhnə onun doğmaları tərəfindən həm qürur, həm də hüzn dolu bir xatirə kimi danışılırdı. Türkiyə Respublikasının Prezidenti Rəcəb Tayyib Ərdoğan da onu yüksək qiymətləndirərək “Azərbaycan aslanı” adlandırmış və ğzü şəxsən təltif etmişdi.
Aprel döyüşlərində son nəfəsə qədər savaş
2016-cı ilin Aprel döyüşləri zamanı Mühüd Orucov yenidən ən ön cəbhədə idi. Düşmənin illərlə “keçilməz sədd” kimi təqdim etdiyi mövqeləri yarıb keçən qəhrəmanlardan biri də məhz o oldu. Döyüş yoldaşlarının dediyinə görə, Mühüd son ana qədər yaralı əsgərlərini döyüş zonasından çıxarır, onları həkimlərə təhvil verirdi. Özü də yaralı olmasına baxmayaraq həkimlərin arxada qalmaq barədə təkidini qəbul etmir, ön xəttə qayıdıb döyüşü axıra qədər davam etdirirdi. Mühüd həmin ilin aprelin 2-dən 3-nə keçən gecə Talış yüksəkliyi uğrunda gedən ağır döyüşlərdə mərmi partlayışı nəticəsində qəhrəmancasına şəhid olur. Aprelin 9-u kapitan Mühüd Orucov öz doğma kəndi Fərəhlidə izdihamla son mənzilə yola salındı.
Adı əbədiyaşar “Azərbaycan aslanı”
Bu gün Mühüd adı çəkiləndə ilk yada düşən mərdlik, cəsarət, qürur və Vətənə sonsuz sevgi olur. Bu mənada, Mühüd şəhid olduqdan sonra xalq onu unutmadı: yüzlərlə ailə yeni doğulan körpəsinə “Mühüd” adını qoydu. Bu ad bu gün də qürurla daşınır, yaşadılır. Bəli, kapitan Mühüd Orucov yalnız ailəsinin, doğmalarının deyil, bütün Azərbaycanın övladıdır. Onun keçdiyi şərəfli yol gələcək nəsillərə örnək, əbədiyaşar bir məktəbdir. Vətən müharibəsinin qəhrəmanları sırasında onun adı hər zaman xüsusi ehtiramla çəkiləcək. Onu da qeyd edim ki, kapitan Orucov hələ xidmət illərində “Azərbaycan Silahlı Qüvvələrinin 90 illiyi”, “Qüsursuz xidmətə görə” III dərəcə, “Hərbi xidmətdə fərqlənməyə görə” III dərəcə, “Azərbaycan Silahlı Qüvvələrinin 95 illiyi” medalı, “Hərbi xidmətdə fərqlənməyə görə” II dərəcə medalları ilə təltif edilib. Bundan əlavə, o, Ali Baş Komandan və Müdafiə naziri tərəfindən dəfələrlə mükafatlandırılıb. Şəhidlik zirvəsinə ucaldıqdan sonra Prezident İlham Əliyevin sərəncamı ilə “İgidliyə görə” medalına layiq görülüb.
Səid Əhmədli
