Bu gün Azərbaycan Respublikası Konstitusiyasının qəbul edilməsindən 30 il ötür. Bu əlamətdar gün münasibətilə Cəfər Cabbarlı adına Respublika Gənclər Kitabxanasında “Azərbaycan Respublikası Konstitusiyası – 30” adlı virtual kitab sərgisi hazırlanıb.
Avropa.info xəbər verir ki, virtual sərgidə Ümummilli lider Heydər Əliyevin və Azərbaycan Respublikasının Prezidenti İlham Əliyevin, həmçinin Azərbaycan Respublikası Konstitusiya Məhkəməsinin sədri Fərhad Abdullayevin konstitusiya və suverenlik mövzusunda söylədikləri dəyərli fikirlər yer alır.
Kitabxana əməkdaşları tərəfindən hazırlanan materialda bir sıra rəsmi sənədlərlə yanaşı, “Heydər Əliyev və müstəqil Azərbaycanın ilk Konstitusiyası”, “Heydər Əliyev və Azərbaycan Respublikasının Konstitusiyası”, “Azərbaycan Respublikası Konstitusiyasının preambulası və ümumi müddəaların şərhi”, “Konstitusiya hüququ” kimi Azərbaycan və rus dillərində nəşr edilən kitabların da tam mətni təqdim edilir.
Virtual kitab sərgisində nəşrlərlə yanaşı “Heydər Əliyev və müstəqil Azərbaycan Konstitusiyası”, “Konstitusiyanın əsas prinsipləri dünyəvi, demokratik və hüquqi dövlətin təməlidir”, “Azərbaycan Respublikasının Konstitusiyası mütərəqqi dəyərləri əks etdirən ali hüquqi sənəddir” kimi dövrü mətbuat nümunələri də sərgilənir.
“Azərbaycan Respublikası Konstitusiyası – 30” adlı virtual kitab sərgisi kitabxananın rəsmi saytında https://www.ryl.az/multimedia/azerbaycan-respublikasi-konstitusiyasi-30 yerləşdirilib.
