Gəncliyə Yardım Fondu, Yeni Azərbaycan Partiyası Yasamal Rayon Təşkilatı və Beynəlxalq Qalereyanın birgə təşkilatçılığı ilə 8 Noyabr Zəfər Gününə həsr olunmuş “Zəfər sənə yaraşır, Azərbaycan!” adlı rəsm sərgisi Gəncliyə Yardım Fondunun H. Z. Tağıyev adına konfrans zalında keçirilib. Layihənin rəhbəri Aygün Əzizovadır.
Tədbirin rəsmi hissəsi Azərbaycan Respublikasının Dövlət Himni və Türkiyə Respublikasının İstiqlal Marşının səsləndirilməsi ilə başlayıb. Vətən uğrunda canından keçmiş şəhidlərin xatirəsi bir dəqiqəlik sükutla yad edilib.
Beynəlxalq Qalereyanın rəhbəri Elnurə İsgəndərova çıxışında 44 günlük Vətən müharibəsində qazanılan Qələbənin 5 illiyinin böyük qürurla qeyd edildiyini bildirib. O, Prezident və Müzəffər Ali Baş Komandan İlham Əliyevin qətiyyətli rəhbərliyi, Azərbaycan Ordusunun şücaəti sayəsində torpaqların işğaldan azad edildiyini qeyd edib. İsgəndərova azad edilmiş bölgələrdə həyata keçirilən bərpa və yenidənqurma işlərinin Azərbaycanın güc və iradəsinin göstəricisi olduğunu vurğulayıb. Şəhidlərin fədakarlığının heç zaman unudulmayacağını diqqətə çatdırıb.
Gəncliyə Yardım Fondunun rəhbəri Ahmet Tecim çıxışında şəhidliyin ən ali zirvə olduğunu bildirib. O, bu gün ölkədə təhlükəsiz və rahat həyatın, torpaqların azad edilməsinin Prezident İlham Əliyevin rəhbərliyi və Azərbaycan əsgərinin qəhrəmanlığı sayəsində mümkün olduğunu deyib. “Dəmir Yumruq” əməliyyatının Azərbaycan Ordusunun gücünü və türk insanının cəsarətini göstərdiyini vurğulayan Ahmet Tecim şəhidlərə rəhmət, qazilərə şəfa, şəhid ailələrinə səbr diləyib.
Sərgidə RM ART Studionun rəhbəri, Azərbaycan Dövlət Pedaqoji Kollecinin müəllimi Rəsmiyyə Mahmudova, Şuşa Musiqili Dram Teatrının quruluşçu rəssamı və FA ART Studionun rəhbəri Fatma Əliyeva, RF ART Studionun rəhbəri Fidan Rüstəmzadə, İnci Akademiyasının rəhbəri İnci Məstəliyeva, Lider Tədris Mərkəzinin rəhbəri Ülviyyə İskəndərova, Şatu Sənət Evinin rəhbəri Turan İlham və tələbələri, rəssamlar Nərminə Uluxanova, Leyla Orucova, Firdovsi Hacıyev, Nurəddin Məmmədov, Aygün Qürbətova, Nərgiz Verdiyeva, Səadət Nərmin Hacıyeva, Hüseynli Pərvanə, ADPU-nun müəllimi və rəssam Səmayə Rzayeva, “Gənc İstedadlar” liseyinin təsviri incəsənət müəllimi Təranə Əhmədova iştirak ediblər.
Bədii hissədə Lider rəqs qrupunun “Şuşanın dağları” və “Gözün aydın, Qarabağ” rəqsləri təqdim olunub. Balaca istedadlı ifaçılar Məsumə Nəcəfzadə “Ey Vətən”, Sevgi Seyfullayeva isə “Qarabağ Azərbaycandır” mahnıları ilə çıxış ediblər.
Tədbirin sonunda iştirakçılara diplomlar təqdim olunub, xatirə fotoları çəkilib.
Aygün Oqtay
Fotolar Ayazındır
