Oktyabrın 30-da “Ziyalı Ocağı” İctimai Birliyi Abşeron rayonunun Xırdalan şəhərində yerləşən 11 nömrəli tam orta məktəbdə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Zərərli mənəvi zəhərlənmələr böyük təhlükə mənbəyidir” adlı maarifləndirici seminar keçirib.
Avropa.info xəbər verir ki, tədbir Azərbaycan Respublikasının Dövlət Himninin səsləndirilməsi və Vətən uğrunda canından keçən şəhidlərin xatirəsinin bir dəqiqəlik sükutla yad edilməsi ilə başlayıb.
Seminarı giriş sözü ilə açan Xırdalan şəhər 11 nömrəli tam orta məktəbin təlim-tərbiyə işləri üzrə direktor müavini, şəhid Hüseyn Nəcəfzadənin anası Könül Nəcəfova iştirakçıları salamlayaraq qonaqları təqdim edib. O bildirib ki, bugünkü gənc nəsli zərərli xarici təsirlərdən müdafiə etmək, gələcəyi qorumaq, mühafizə etmək və əmin əllərə tapşırmaq deməkdir. Bu müqəddəs vəzifənin yükü hər birimizin çiyinlərindədir.
Layihə rəhbəri İlahə Əliyeva “Zərərli mənəvi zəhərlənmələr böyük təhlükə mənbəyidir” mövzusunda çıxış edərək internetin, sosial şəbəkələrin və müxtəlif platformaların həm faydalı, həm də zərərli tərəflərindən danışıb. O qeyd edib ki, sosial şəbəkələr yalnız şəxsi ünsiyyət və ictimai münasibətlərin qurulması üçün vasitə deyil, həm də ictimai-siyasi baxımdan birbaşa təsir və idarəetmə alətidir:
“Bu gün bütün dünyanı hörümçək toru kimi öz ağuşuna alan sosial şəbəkələr yalnız şəxsi ünsiyyət və ictimai münasibətlərin qurulması, inkişaf etdirilməsi üçün yaradılan platformalar deyil, o eyni zamanda ictimai-siyasi baxımdan biraşa təsir və idarəetmə vasitəsidir. İnternetdən, sosial şəbəkələrdən qarşıdurma, informasiya müharibəsi meydanı olaraq istifadə edən radikal qrupların, ekstremistlərin, terrorçuların məqsədləri xalqlar, ölkələr və bütünlükdə insanlar arasına nifaq salmaq, qırğınlar törətmək, dini ayrı-seçkilik yaratmaqdır. Təsir kanalı olaraq istifadə olunan bu platformaların başlıca hədəfi xüsusilə uşaq və gənclərdir”.
“Dilimizə, dinimizə, adət-ənənələrimizə, bütünlükdə, milli mentalitetimizə qarşı gözlənilən hər cür xarici təsirlərin, ideoloji təxribatların qarşısını əl-ələ verərək, birgə, mütləq şəkildə almalıyıq. Aramıza zəhərli və ziyanlı alaq otlarının daxil olmasına qətiyyən icazə verməməliyik. Sizin hər biriniz mövcud cəmiyyətimiz tərəfindən qınan və qəbul edilməyən yaşam tərzi ilə bağlı aparılan təbliğatlara uymamalı, milli-mənəvi dəyərlərimizə və ailə modelimizə üstünlük verməlisiniz. Siz bu torpağın, bu vətənin, bu xalqın övladlarısınız və ona vəfa, etibar, sədaqət borcunu şərəflə ödəməlisiniz”, – deyə o əlavə edib.
Layihənin eksperti Fuad Hüseynzadə “Uşaqlar və yeniyetmələr arasında vətənpərvərliyin təbliği” mövzusunda çıxış edərək, Azərbaycanın ərazi bütövlüyü uğrunda canını fəda edən igid əsgərlərin qəhrəmanlığından danışıb:
“Bəşəri ideyalar çərçivəsində formalaşan milli dəyərlərimizi müasir gənclik bu gün layiqincə sevərək yaşatmalı, sonsuz qürur və fəxrlə gələcəyə daşımalıdır”.
Ekspert audutoriyaya səslənərək, onları sosial şəbəkələrdə fəal olmağa, dünyanın müxtəlif dillərində ölkəmizi və onun igid, qəhrəman oğlanlarını, qızlarını tanıtmağa çağırıb.
Araşdrımaçı jurnalist Rəsul Mirhəşimli isə “İnternetin həyatımızdakı rolu: müsbət və mənfi tərəflər” mövzusunda məruzə ilə çıxış edərək, internetin insanlara verdiyi faydalardan və eyni zamanda onun yarada biləcəyi təhlükələrdən və mənfi təsirlərindən danışıb:
“İnternet müasir dövrdə insanların həyatının ayrılmaz hissəsinə çevrilib. O, bizə məlumat əldə etməyi, ünsiyyət qurmağı və təhsil almağı daha asan edir. İnsanlar internet vasitəsilə dünyada baş verən hadisələrdən anında xəbərdar ola bilirlər. Lakin internetin mənfi tərəfləri də az deyil, asılılıq, vaxt itkisi və yanlış məlumatların yayılması kimi problemlər mövcuddur. Buna görə də internetdən istifadə edərkən məsuliyyətli və ölçülü olmaq vacibdir”.
Seminar layihə rəhbəri və ekspertlərin iştirakı ilə şagirdlərlə canlı debat və müzakirə şəraitində davam etdirilib.
